Cúrsaí nua Gaeilge dírithe ar mhuintir Mheiriceá Thuaidh le tosú ag Gaelchultúr

Beidh ranganna ar líne a bheidh dírithe ar dhaoine i Meiriceá Thuaidh ar spéis leo an Ghaeilge á dtairiscint agus an institiúid oideachais Gaelchultúr an samhradh seo. Tá beartaithe ag an eagraíocht, atá lonnaithe i mBaile Átha Cliath, ranganna a chur ar fáil ag amanna a fheilfidh níos fearr d’fhoghlaimeoirí teanga i Meiriceá Thuaidh ná mar a fheileann na cúrsaí atá ar fáil faoi láthair. 

Maíonn Gaelchultúr go bhfuil os cionn 35% de na foghlaimeoirí teanga atá i mbun cúrsaí leis an institiúid lonnaithe taobh amuigh d’Éirinn, agus go leor acu i Stáit Aontaithe Mheiriceá agus i gCeanada. Freastalaíonn na daoine sin ar ranganna a reáchtáiltear de réir chlog na hÉireann anois agus cuid acu ag éirí go moch ar maidin nó ina suí go deireanach san oíche le bheith i láthair. 

An chéad téarma eile, beidh ranganna ar siúl ag 19.00 de réir chlog oirthear Mheiriceá (meán oíche de réir chlog na hÉireann) le freastal níos fearr a dhéanamh ar na foghlaimeoirí sin atá lonnaithe i Meiriceá. Beidh ar mhuintir California agus Vancouver a bheith ar fáil ag 16.00 le freastal ar na ranganna ach táthar ag súil go bhfeilfeadh an t-am sin níos fearr dóibh ná mar a fheileann an 11.00. 

View this post on Instagram

A post shared by Gaelchultúr (@gaelchultur_)

“Is cúis mhór áthais é seo do Ghaelchultúr a bheith in ann ranganna ginearálta Gaeilge do dhaoine fásta i Meiriceá agus Ceanada a chur ar fáil. Beidh cúig leibhéal éagsúla i gceist sa chúrsa deich seachtaine seo agus cuirfear tús leis an tseachtain dar tosach 3 Bealtaine,” a dúradh i ráiteas a chuir Gaelchultúr amach. 

Cuireann Gaelchultúr cúrsaí Gaeilge ar fáil do ghlantosaitheoirí agus do chainteoirí líofa araon agus beidh rogha leathan cúrsaí ar fáil don té atá i Meiriceá Thuaidh agus atá ag iarraidh snas a chur ar a scileanna teanga. 

Tuairiscíodh ar an suíomh seo an fómhar seo caite gur tháinig méadú 261% ar líon na ndaoine a chláraigh le cúrsaí Ghaelchultúir an bhliain seo caite. 

“Is cinnte go raibh méadú suntasach ar líon na ndaoine as tíortha eile a thug faoi na cúrsaí. Bhí muid in ann freastal ar dhaoine nach bhfuil cónaí orthu in Éirinn den chéad uair riamh. Is léir go bhfeileann an fhoghlaim ar líne go mór do dhaoine agus go ndeachaigh go leor daoine in Éirinn agus thar lear i ngleic leis an gcineál foghlama sin,” a dúirt Niamh Ní Chadhla, Príomh-Oifigeach Feidhmiúcháin Ghaelchultúir le NÓS.