Agus gan ach ceithre lá fágtha go Lá an Daonáirimh, tá feachtas BÚA – ‘Bainim Úsáid Aisti’ – ag spreagadh phobal na Gaeilge chun an fhoirm a fháil agus a líonadh i nGaeilge.
Tá díograiseoirí Sheachtain na Gaeilge, an dream taobh thiar de BÚA, ag cur ina luí orainn go bhfuil foirmeacha Dhaonáirimh 2016, atá á ndáileadh ó lár an Mhárta, á scaipeadh suas go dtí an lá mór é féin, an Domhnach 24 Aibreán.
Mar chuid den fheachtas is déanaí seo, iarrann BÚA orainn leagan Gaeilge d’fhoirm an Daonáirimh a fháil, a rá lenár gcairde gur féidir leo déanamh amhlaidh, agus Twibbon BÚA a chur lenár ngrianghraf próifíle ar Facebook le tacú leis an fheachtas.
Fiú má tá foirm Bhéarla faighte agat, níl le déanamh agat ach glaoch a chur ar Oifig an Daonáirimh (1850 2016 04) roimh an Domhnach chun leagan Gaeilge den fhoirm a ordú.
Má tá foirm Bhéarla agat don daonáireamh is féidir í a athrú agus leagan Gaeilge a fháil! #Daonáireamh2016 #Census2016 #Gaeilge #BÚA
— Seachtain na Gaeilge (@SnaGaeilge) 1 Aibreán 2016
Moltar chomh maith gur féidir leas a bhaint as leagan aistrithe den fhoirm ar www.cso.ie má tá aon deacracht agat le ceist ar leith i nGaeilge.
Ag labhairt le NÓS di, dúirt Orlaith Nic Ghearailt ó Sheachtain na Gaeilge gurb é seo an feachtas is déanaí i sraith fheachtas éagsúil atá á reáchtáil ó mhí na Nollaig chun daoine a spreagadh agus a chumasú chun an Ghaeilge a úsáid ina saol laethúil.
“Thosaigh muid amach le rudaí bunúsacha, amhail Facebook a úsáid i nGaeilge, nó beannacht a dhéanamh i nGaeilge ar ríomhphost ach tá muid ag díriú ar fhoirm an Dhaonáirimh a líonadh i nGaeilge an mhí seo, gníomh atá níos dúshlánaí agus atá dírithe ar dhaoine líofa go leor sa teanga.”
Gach mí cuirtear dúshlán roimh dhaoine gníomh éigin a dhéanamh agus giolc nó pictiúr a scaipeadh ar na meáin shóisialta faoi.
Coinnígí ar an eolas faoi fheachtas BÚA ar an haischlib #BUA agus leanaigí Seachtain na Gaeilge ar Twitter agus Facebook.
