GAILEARAÍ: Halla na Cathrach Dearg le Fearg i mBéal Feirste

Chruinnigh cainteoirí Gaeilge agus a lucht tacaíochta ag Halla na Cathrach i mBéal Feirste Dé Sathairn le comóradh a dhéanamh ar an gcéad mhórléirsiú a rinne an grúpa feachtais ‘An Dream Dearg’ cothrom an lae sin dhá bhliain ó shin. Bhí suas agus anuas le 200 duine i láthair ag ócáid an tSathairn nuair a lasadh soilse dearga ar fud an halla mar chomhartha tacaíochta don éileamh ar Acht Gaeilge do na Sé Chontae. Eagraíodh an chéad léirsiú sin i mBéal Feirste mar gheall ar an gcinneadh a rinne Aire Oideachais na linne Paul Givan, ón DUP, an liúntas £50,000 a bhaint den scéim Líofa.

Dúirt Pádraig Ó Tiarnaigh, ón Dream Dearg, gur “cuireadh tús le ré úr” an lá sin agus go bhfuil súil aige gur chuir comóradh an tSathairn “splanc breise” leis an bhfeachtas ar son Acht Gaeilge.

“Tá muid ag súil le bliain mhór dhearg eile  chun dúshlán a thabhairt don stát agus dóibh siúd a dhiúltaíonn meas agus aitheantas dár bpobal. Ba léiriú físiúil a bhí anseo ar an tacaíocht leathan atá don Acht Gaeilge; ritheadh agus glacadh le rún i gComhairle Bhéal Feirste anuraidh chun tacú leis, mar a thacaíonn Rialtas na hÉireann, Comhairle na hEorpa, na Náisiúin Aontaithe agus tromlach na bpolaiteoirí tofa ó thuaidh,” a dúirt sé.