Tá an cinneadh déanta ag lucht riartha na páirce náisiúnta a dtugtaí ‘Brecon Beacons National Park’ uirthi ainm Breatnaise na páirce – Bannau Brycheiniog – a úsáid feasta. Dúirt lucht na páirce go bhfuil siad ag iarraidh “cultúr agus oidhreacht” na háite a chur chun cinn.
Baineann an t-ainm Breatnaise leis an ríocht Brycheiniog, ríocht a raibh an rí Brychan i gceannas air sa chúigiú haois, agus leis na sléibhte atá le fáil sa cheantar. Is ionann ‘bannau’ na Breatnaise agus ‘beanna’ na Gaeilge, mar sin ‘Beanna (na ríochta) Brycheiniog’ is brí leis an ainm nua ar an bpáirc. Tá teorainneacha na páirce náisiúnta mar atá sa lá atá inniu ann beagnach mar a chéile le teorainneacha na ríochta ársa mar a bhí 1,500 bliain ó shin.
Dúirt príomhfheidhmeannach na páirce Catherine Mealing-Jones gur léir don fhoireann nach raibh bunús maith faoin ainm ‘Brecon Beacons’ agus gurbh fhearr a d’fheil ‘Bannau Brycheiniog’ don cheantar atá laistigh den pháirc. Níl aon fhianaise ann, a dúirt sí, go ndóití rabhchán ar bharr na mbeann.
“De réir mar a bhreathnaíomar isteach sa scéal thuigeamar nach raibh ciall ar bith leis an ainm ‘Brecon Becaons’. Is cur síos thar a bheith Sasanach é ar rud is dócha nár tharla. Ní bheadh cuma mhaith ar an eagraíocht comhshaoil [an pháirc] dá mbeadh rabhchán mór a dhónn carbón mar lógó aici.
“Tá na hainmneacha Breatnaise go hálainn. Cuireann siad síos ar rudaí. Níl muid ag éileamh ar dhaoine an t-ainm Breatnaise a úsáid, ach tá súil againn go mbeidh sé in úsáid de réir a chéile,” a dúirt sí.
Ní hiod é an chéad uair a athraíodh ainm páirce sa Bhreatain Bheag le deireanas. Rinneadh an cinneadh fáil réidh leis an ainm ‘Snowdonia’ anuraidh agus tugtar Páirc Náisiúnta Eryri ar an bpáirc sin i dtuaisceart na tíre anois. Tá an-inmní ar lucht labhartha na Breatnaise le blianta beaga anuas faoin gcreimeadh atá á dhéanamh ar logainmneacha Breatnaise ar fud na tíre, go mór mór i gceantair ina labhraítear an Bhreatnais mar phríomhtheanga.
Tá trí pháirc náisiúnta sa Bhreatain Bheag ach tá ráite ag lucht riartha na páirce eile nach bhfuil aon rún acu an t-ainm atá ar Pembrokeshire Coast National Park (Ardfordir Penfro) a athrú i láthair na huaire.
Tá Páirc Náisiúnta Bannau Brycheiniog tuairim is 1,350km² agus mealltar thart ar 4,000,000 duine chun na páirce gach bliain.
