Seans nach bhfuil sí ar na teangacha Ceilteacha is láidre dá bhfuil ann ach níl aon easpa misnigh ar phobal labhartha na Coirnise.
Fógraíodh bás na teanga nuair a d’éag na cainteoirí dúchais deiridh, ar nós Dolly Pentreath, ag deireadh an 18ú céad ach rinneadh athbheochan ar Kernewek – a bhfuil dlúthcheangal aici leis an Bhriotáinis agus leis an Bhreatnais – ag tús an 20ú céad.
De réir taighde a rinneadh sa bhliain 2008 tá thart ar 2,000 duine a labhraíonn an teanga go líofa agus i nDaonáireamh 2011 d’fhreagair 557 gurb í an Choirnis a bpríomhtheanga.
Inniu tá an teanga á cur chun cinn ag gníomhaithe díograiseacha ar fud Chorn na Breataine agus an tseachtain seo tá iarrachtaí breise ar siúl chun daoine a mhealladh i dtreo na Coirnise mar chuid de ‘Speak Cornish Week’.
Cuireadh tús le himeachtaí Dé Sathairn nuair a crochadh comharthaí Coirnise ar bhealach ‘guerrilla’ i gceantar Hellys (Helston) agus tá clár lán curtha le chéile a chlúdaíonn taispeántais scannán, grúpaí comhrá, drámaí, cainteanna agus seisiúin cheoil a leanfaidh ar aghaidh go 13 Iúil.
I measc na n-ionad a bheas in úsáid tá an t-aon teach tábhairne i gCorn na Breataine inar féidir leat deoch a iarraidh i gCoirnis, an Star Inn i bPorthkellys (Porkellis), agus tá imeachtaí ar bun fiú in áiteanna taobh amuigh den tír mar Y Mochyn Du (An Mhuc Dhubh), pub clúiteach Breatnaise i gCaerdydd, chun dlúthpháirtíocht a léiriú le Coirniseoirí.
Maga, an t-eagras a spreagann úsáid na Coirnise, atá ag eagrú na Seachtaine agus tá an clár iomlán le feiceáil anseo.
