Uaireanta is fearr faic
Déan tada agus tá leat!

In Éirinn, is furasta clú na leisciúlachta a tharraingt ort féin as a bheith i do shuí thart ag déanamh faic.

Ní tréith mhaith í in Éirinn, b’fhéidir.

Ach ná caill misneach, mar is féidir aistriú go príomhchathair na Cóiré Theas, Seoul, áit a dtugtar aitheantas don fhalsacht.

Ag an deireadh seachtaine díreach caite, tháinig móruaisle na dímhaoine le chéile i bPáirc Ichon Hanan i gcathair Seoul le bheith páirteach i gcomórtas aisteach ina gcuirtear dúshlán roimh iomaitheoirí tada a dhéanamh.

southkoreaspacing

I mbliana chuir breis agus 2000 iarrthóir isteach air agus roghnaíodh 70 duine le dul in iomaíocht lena chéile.

Níl cead ag iomaitheoirí úsáid a bhaint as teicneolaíocht.

Níl cead acu gáire a dhéanamh ná titim ina gcodladh, ach ligtear dóibh an tart a shásamh le deoch uisce agus dul chuig an leithreas nuair is gá.

Déantar an cuisle croí a mheas gach 15 bhomaite agus is ag an duine leis an ráta croí is socra le linn an chomórtais a bhíonn an bua.

Is rapaire as cathair Seoul, a dtugtar Crush air, an buaiteoir i mbliana.

Tá sé aitheanta anois mar an fear is fearr i mbun faic a dhéanamh.

Is é an t-ealaíontóir WoopsYang a d’fhorbair an coincheap don chomórtas seo le haird a dhíriú ar an ráta ard féinbháis agus struis i measc mhuintir na Cóiré Theas.

Anuraidh reáchtáladh an chéad chomórtas taobh amuigh den tír, i mBéising na Síne, agus síleann muidne anseo in oifigí NÓS go bhfuil sé in am an comórtas a thabhairt chomh fada le hÉirinn anois!