Buaic-Ghradam Cumarsáide an Oireachtais le bronnadh ar Mhártan Ó Ciardha

Is ar an iriseoir aitheanta spóirt as Cois Fharraige, Mártan Ó Ciardha, a bhronnfar Buaic-Ghradam Cumarsáide an Oireachtais i gCill Airne an mhí seo chugainn. Tá a cháil bainte amach ag Mártan mar thráchtaire spóirt ar an teilifís agus ar an raidió agus le blianta beaga anuas mar cholúnaí spóirt leis an tseirbhís nuachta Tuairisc.ie agus an nuachtán Foinse.

Bronntar Buaic-Ghradam Cumarsáide an Oireachtais ar dhuine a bhfuil “sár-shaothar saoil” déanta acu in earnáil na meán cumarsáide Gaeilge. Is ag Ócáid Bhronnta Ghradaim Chumarsáide an Oireachtais a bhronntar an gradam, ócáid a reáchtáiltear mar chuid d’Oireachtas na Samhna. 

Dúirt Mártan gur “onóir a bhí agus atá ann deis a fháil freastal a dhéanamh ar an bpobal is gaire [dá] chroí, muintir na Gaeltachta”. 

Ba leis an nuachtán Gaeltachta Amárach a thosaigh Mártan a ghairm iriseoireachta agus é ina fhear óg i nGaeltacht na Gaillimhe. Chuaigh sé isteach in RTÉ Raidió na Gaeltachta ina dhiaidh sin mar chlár-reachtaire agus é ag obair i Rannóg an Spóirt den chuid is mó. Chaith sé os cionn 30 bliain le Raidió na Gaeltachta agus chríochnaigh sa stáisiún ina Eagraí Spóirt in 2009. 

Tá a shaol caite aige ag tráchtaireacht agus ag tuairisciú ar na cluichí Gaelacha den chuid is mó ach tá Mártan tar éis a bheith i láthair ag roinnt mhaith Cluichí Oilimpeacha i gcaitheamh na mblianta chomh maith. Bhuaigh sé Gradam Cumarsáide an Oireachtais do ‘Colúnaí na Bliana’ sa bhliain 2006, Gradam Saoil Chumann Lúthchleas Gaeil in 2008, agus Gradam Saoil Chumann Iriseoirí na gCluichí Gaelacha in 2017. 

“Tá mór-aithne agus ardmheas ag saol Fodhla ar thráchtaireacht chumasach údarásach mheáite Mhártain Uí Chiardha, bíodh sé ag tuairisciú ar chluichí idir-chlubanna nó ag díriú ár n-aird ar ócáidí móra idirnáisiúnta spóirt. Tá grá agus paisean don spórt, chomh maith le tuiscint agus meas ar a chuid éisteoirí agus a chuid léitheoirí, le sonrú i ngach abairt a thagann uaidh, agus cáil na soiléire agus na fírinne ar a bhriathra. Déanaim comhghairdeachas ó chroí leis as a bhfuil bainte amach aige i gcaitheamh na mblianta,” a dúirt Máirín Nic Dhonnchadha, Ceannasaí an Oireachtais. 

Bronnfaidh Aire Stáit na Gaeltachta agus an Spóirt Jack Chambers an gradam seo chomh maith leis na gradaim eile ag Searmanas Bronnta na nGradam Cumarsáide in Óstán an Gleneagle i gCill Airne ar an 2 Samhain mar chuid d’Oireachtas na Samhna 2022.