Lá stairiúil atá ann inniu mar ag 4in tráthnóna seolfar an chéad chainéal teilifíse Gaeilge do pháistí riamh.
Beidh Cúla4 – ar togra é de chuid TG4 – ag craoladh gach lá ó 6rn go 8in le réimse leathan de chláir bheochana, de chláir shiamsaíochta agus d’ábhar oideachasúil, chomh maith le seirbhís nuachta do dhaoine óga.
Is ar pháistí suas le 12 bhliain d’aois atá an cainéal dírithe agus i measc na sraitheanna nua a bheidh le feiceáil air tá M’Ainm Mo Scéal, Anfa agus Teach Spraoi.
Beidh aithne mhaith ag an lucht féachana ar dhuine de phríomhláithreoirí Cúla4, Niamh Ní Chróinín, agus is iad Seosamh Mac Seoin agus Síle Ní Chonghaile a bheidh i gcuideachta léi ar an scáileán.
Sé nóiméad a bheidh sa mhír nuachta a chraolfar ón Máirt go dtí an Aoine agus is iad Aisling Ní Dhonnabháin agus Seán Ó Maoilchiaráin a chuirfidh na scéalta i láthair.
Tá seoladh Cúla4 ar an bhforbairt is mó in earnáil teilifíse na Gaeilge ó tháinig TG4 ar an bhfód (mar TnaG) in 1996.
Is í an tAire Catherine Martin a sheolfaidh an tseirbhís go hoifigiúil ag ceannáras TG4 i gConamara tráthnóna.
“Tá an-áthas orm a bheith i nGaillimh inniu chun an chéad chainéal Gaeilge riamh atá tiomanta do pháistí a sheoladh,” arsa sise.
“Cuirim fáilte roimh an straitéis chun an t-ábhar a chur ar fáil go digiteach, rud a chinntíonn gur féidir rochtain a fháil ar an ábhar ar bhonn ilardáin agus go mbeidh Cúla4 ar fáil do pháistí cibé áit a bhfuil siad.”
Beidh Cúla4 ar fáil ar líne ar Cúla4.com, ar chainéal 18 ar Saorview, ar chainéal 602 ar Virgin Media, ar chainéal 624 Sky agus ar Eir.
Guíonn NÓS gach rath ar an tseirbhís nua agus táimid ar bís go mbeidh cainéal dá gcuid féin anois ag Gaeil óga na cruinne!
