Eisíodh an chéad chlár ó shraith nua podchraoltaí le Caoimhe Ní Chathail inniu. Pléann “30 S.O.S” le cúrsaí an tsaoil agus deireadh a tríochadú bliain ag druidim leis an láithreoir. Aithneoidh éisteoirí guth binn an Chonallaigh ó “Blas an Déardaoin” ar BBC Raidió Uladh agus “Éadaí SOS” ar TG4 agus BBC2 NI chomh maith le roinnt tograí eile sna meáin. Tá sraitheanna teilifíse amhail “Saolta ’s Gaolta” agus “Peataí” léirithe agus stiúrtha aici fosta. Agus éachtaí móra déanta aici sna fichidí, agus an breithlá mór 30 ag teannadh léi, tá Caoimhe ag tabhairt aghaidh ar an todhchaí. Tá ceiliúradh mór bríomhar le déanamh, ach tá neart le foghlaim fosta.
Cuirfidh Caoimhe aíonna éagsúla faoi agallamh i rith na sraithe, idir dhaoine atá 30 nó níos aosta agus daoine atá ar tí an aois úd a bhaint amach. Is é sprioc an phodchraolta “tacaíocht, faoiseamh, agus spreagadh” a thabhairt do dhaoine atá ag dul i treo 30. Díreofar ar an tsaol ghairmiúil, féinmhuinín, cúrsaí stíle, cleamhnas, agus comhairle airgeadais sna cláracha.
“Dul Chun Cinn Gairme” is teideal don chéad eipeasóid ina dtabharfaidh Eoghan Tomás McDermott ón Communications Clinic a léamh ar chúrsaí éagsúla agus ina roinnfidh Éadaoin Fitzmaurice agus Eoin Keane a dtaithí féin ar an domhan ghairmiúil. Anuas air sin, beidh cóitsealaí cleamhnais, comhairleoir gairme, saineolaí airgeadais, agus gínéiceolaí le cluinstin seachnóin na sraithe. Roinnfidh siad na cleasanna agus na leideanna a chuideoidh le héisteoirí atá ag tabhairt faoin chéad tréimhse eile ina saol. Más é an geimhreadh deireadh an tsaoil, an iad na tríochaidí an samhradh?
Deir Caoimhe í féin faoin tsraith:
“Bhí na comhráite seo agam go minic le cairde cibé agus 30 ag teannadh liom. Theastaigh uaim spás a chruthú go dtiocfadh le haíonna agus éisteoirí plé oscailte a dhéanamh ar na dúshláin agus na buanna a bhaineann le tiontú 30. Aidhm “30 S.O.S” ná éisteoirí a spreagadh agus a chur ar a suaimhneas gur deis iontach atá in 30 le machnamh a dhéanamh ar na tosaíochtaí atá againn don ré úr seo.”
Is léiriú é “30 S.O.S” de chuid Dearcán Media a taifeadadh i Stiúideo Feirste agus atá maoinithe ag an Chiste Craoltóireachta Gaeilge. Tá an chéad chlár de chuid “30 S.O.S” le fáil anois ar Spotify agus Apple Podcasts.
