Tá eagarthóir nua ar NÓS, is é sin Conor Torbóid, Feirsteach óg a bhfuil an-dul chun cinn déanta aige sna meáin agus sna healaíona Gaeilge le tamall.
Is i nGleann Ghormlaithe, bruachbhaile i dtuaisceart Bhéal Feirste, a tógadh é agus a cothaíodh suim nach beag sa léamh agus sa scríobh ann. Chaith sé an bhliain is déanaí ag ullmhú cnuastéip rapcheoil dhátheangach Chicken Sambos, chomh maith leis an tsraith raidió Scríbhneoirí an tSléibhe ar BBC Raidió Uladh agus RTÉ Raidió na Gaeltachta le Corcra Media.
Tá sé ainmnithe ar an ghearrliosta do ‘Réalta Óg na Bliana’ ag Gradaim Chumarsáide an Oireachtais as a chuid oibre ar an tsraith sin.
“Tá mé ag súil go mór leis an aistear nua seo agam le NÓS,” arsa Conor agus é ag caint faoina phost úr. “Is cuimhin liom an iris a léamh agus mé ar scoil agus mothaím gur céim nádúrtha í seo agus mo chuid saothair féin idir lámha agam.”
Ag labhairt dó faoin fhís atá aige don iris, phléigh sé scóip NÓS agus an tionchar is féidir leis imirt ar chultúr na teanga trí chéile:
“Bhí an iris riamh chun tosaigh ar lucht a linne agus ba mhaith liom go gcothófar mar uirlis chultúrtha na nGael í san am atá amach romhainn. Sin ráite, cé gur iris chultúrtha trí mheán na Gaeilge í, ní ar chúrsaí phobal na Gaeilge amháin a leagfar an bhéim.
“Beidh pobal na Gaeilge i gcroílár na hirise i dtólamh ach tá an oiread sin buanna ag na Gaeil i réimse leathan ábhar nach bhfuil baint acu leis an Ghaeilge. Scríobhtar faoi nósanna faisin, scannáin, ceol agus neart eile i dteangacha an domhain agus leanfaidh NÓS de bheith á dhéanamh sin as Gaeilge chomh maith. Is é sin an dóigh a gcothófar saol iomlán trí Ghaeilge agus cuideoidh sé le seasmhacht na teanga a neartú.
“Stiúrann an cultúr NÓS ach ba mhaith liom go mbeidh an cultúr á stiúradh ag NÓS ar bhealach fosta.”
Mar fhocal scoir, mhol sé óige na tíre agus an acmhainneacht s’acu smaointe nua agus beocht as an úr a chur sa tsochaí:
“Is í an óige an todhchaí agus measaim go bhfuil sé ríthábhachtach go dtugann muid spás daofa siúd atá ag cur le cultúr na Gaeilge tríd na healaíona agus an meáin. Ní mise amháin a bheas ar stiúir na hirise seo – beidh an óige agus an pobal ar fad in achan fhocal a fhoilseofar.”
Más suim leat a bheith i do scríbhneoir le NÓS, déan teagmháil ag conor@nos.ie.
