Bronnfar Buaic-Ghradam Cumarsáide Oireachtas na Gaeilge ar an gcraoltóir aitheanta as Gaeltacht Thír Chonaill Áine Ní Churráin ag searmanas ar líne ag deireadh na míosa.
Chuaigh Áine ar scor níos luaithe i mbliana i ndiaidh di dhá scór blianta a chur isteach le RTÉ Raidió na Gaeltachta, áit a raibh sí ina láithreoir ar chlár irise an tuaiscirt Barrscéalta le fada an lá. Thosaigh sí leis an stáisiún mar chlár-reachtaire in 1980, agus chaith sí tréimhsí fada i mbun cúrsaí nuachta ar an stáisiún.
Bhí lámh aici i gcláir irise freisin, agus í ina láithreoir agus léiritheoir ar shraitheanna éagsúla. Ina measc sin bhí an clár Líon Tí, clár a bhí dírithe ar mhná den chuid ba mhó. In 1996 a chuir sí an clár Barrscéalta, atá ar an aer go fóill, i láthair den chéad uair.
Dúirt Áine gur “onóir mhór” di féin agus do RTÉ Raidió na Gaeltachta an gradam a fháil ó Oireachtas na Gaeilge.
“Tá cuimhní iontacha agam a bheith ag freastal agus ag craoladh ó na hOireachtais i gcaitheamh mo dhaichead bliain i mbun craoltóireachta. Is páirt thábhachtach de shaol na Gaeilge é an tOireachtas agus tá súil agam ionchur a bheith agam agus freastal ar an Oireachtas sna blianta atá le teacht. Míle buíochas le coiste an Oireachtais as an onóir seo a bhronnadh orm,” a dúirt sí.
Ba ag an Oireachtas i nGaoth Dobhair in 1980 a rinne Áine a céad agallamh beo, agallamh a rinne sí leis an scríbhneoir aitheanta Joe Steve Ó Neachtain a d’imigh ar shlí na fírinne níos luaithe i mbliana.
“Craoltóir cumasach a raibh sé sa mhianach aici scéal an phobail a insint agus tacú leis an bpobal áitiúil i gcónaí. Bhí an t-ádh linn oibriú le hÁine ag féile Oireachtais agus ag féilte Pan-Cheilteacha thar na blianta agus tá sé tráthúil, agus Buaic-Ghradam Cumarsáide an Oireachtais á bhronnadh uirthi gur ag an Oireachtas a rinne sí a céad agallamh beo,” a dúirt Liam Ó Maolaodha, Stiúrthóir an Oireachtais.
Fógraíodh an gearrliosta do na rannóga eile sna Gradaim Chumarsáide níos luaithe i mbliana, agus tháinig deireadh leis an vóta poiblí do Réalta Óg na Bliana an tseachtain seo caite. Fógrófar buaiteoir Ghradaim Chumarsáide an Oireachtais uilig ag ócáid ar líne ar shuíomh gréasáin an Oireachtais ar an 28 Deireadh Fómhair ag 19.30.
