Cé gur léir go bhfuil iriseoirí áirithe in Éirinn ciaptha ag droch-chuimhní ar a bheith ag foghlaim na Gaeilge ar scoil agus damáiste buan déanta dá sícé íogair (na créatúir!), tá mórán daoine eile ann nach bhfuil drogall ar bith orthu an Ghaeilge a úsáid mar mhodh cumarsáide.
Ina measc tá Príomhfheidhmeannach Microsoft, Satya Nadella.
Tá ceannaire an ollchomhlacht teicneolaíochta mar aoichainteoir ag cúpla ócáid i mBaile Átha Cliath inniu.
Thug sé le fios ar maidin i nGaeilge go bhfuil sé sásta a bheith anseo in Éirinn.
Chuir sé a lúcháir in iúl ar an chóras giolcaireachta, Twitter.
Go raibh maith agaibh. Tá áthas orm a bheith in Éirinn!
— Satya Nadella (@satyanadella) 3 Deireadh Fómhair 2016
Mar atá a fhios againne, Nósádóirí niamhracha, beatha teanga í a labhairt – agus beatha teanga í a ghiolcadh.
Fuair an fear gnó Indiach roinnt freagraí i nGaeilge ó mhuintir na hÉireann.
D’fhreagair daoine as tíortha eile i nGaeilge fosta é, ina measc @tsrangarajan as Chennai na hIndia, agus @sinraed, Andries van der Werf, as an Ísiltír.
Chuir TG Lurgan scéala chuige chomh maith, i mBéarla.
Ní mó ná sásta atá an t-eagras ceolmhar leis an nuachtán an Independent mar gheall ar a ndearcadh i leith na Gaeilge.
D’fhiafraigh siad d’fhear Microsoft iarraidh ar lucht an fhoilseacháin deireadh a chur lena ndóigheanna fealltacha agus glacadh le féiniúlacht na hÉireann:
@satyanadella @Independent_ie Satya, please ask the so called "Irish Independent" to give up it's Quisling ways and embrace Irish identity
— TG Lurgan (@TgLurgan) 3 Deireadh Fómhair 2016
Rugadh Nadella i gcathair Hyderabad agus is í Telegu teanga a mhuintire.
Is é an príomhchainteoir inniu é ag Cruinniú Teicneolaiochta Microsoft Éireann san Ionad Comhdhála i mBaile Átha Cliath.
Tá a chaint ag díriú ar an dóigh a rachaidh an néalteicneolaíocht chun sochair do mhuintir an domhain uile, go háirithe i gcúrsaí sláinte agus i gcúrsaí oideachais.
Amach sa lá, beidh deis ag mic léinn in Ollscoil Chathair Bhaile Átha Cliath éisteacht leis ag labhairt ar an fhís atá aige don fhoghlaim.
Is i gCampas Naomh Pádraig i nDroim Chonrach a bheas an ócáid sin ar siúl ó 2.30-4.30in.
