Beidh an feachtas ar líne ‘Gaeiltober’ ar siúl arís an mhí seo chugainn, den dara bliain as a chéile, i ndiaidh do na céadta daoine páirt a ghlacadh ann anuraidh. Tá rialacha an fheachtais sách simplí — cuirtear teachtaireachtaí i nGaeilge amháin ar na hardáin éagsúla ar na meáin shóisialta ar feadh na míosa.
Is iad Ailís Níc Aoidh, a tháinig aníos leis an smaoineamh anuraidh agus tá an Gael óg as Tír Eoghain tar éis a fhógairt go bhfuil sé i gceist acu tabhairt faoin dúshlán arís i mbliana.
Ghlac os cionn 1,000 ‘Gaeilgeoir nua’ páirt i bhfeachtas na bliana seo caite, agus seoladh breis agus 4,500 giolc faoin haischlib #Gaeiltober ó 1,453 cuntas éagsúil.
Mheall #Gaeiltober 1,453 cuntas éagsúil agus de réir staitisticí a chuir an tOllamh Kevin Scannell ó Ollscoil Missouri ar fáil do NÓS, ba ‘Ghaelghiolcairí nua’ iad 1,067 de na cuntais sin. Is é sin le rá, nach raibh 1,067 de na cuntais a bhí ag giolcaireacht i nGaeilge le linn mhí Dheireadh Fómhair ar bhunachar an Ollaimh roimhe seo — rud a thugann le fios gur ar éigean a labhair siad Gaeilge ar na meáin shóisialta roimhe seo.
Ní ar Twitter amháin atá #Gaeiltober dírithe, ach ar na hardáin uile agus táthar ag súil go dtiocfaidh borradh faoin nGaeilge ar leithéidí Instagram, TikTok agus Facebook i gcaitheamh na míosa seo chugainn.
Moltar do dhaoine atá ag iarraidh an Ghaeilge a chur chun cinn ar líne an haischlib #Gaeiltober a chur lena dteachtaireachtaí ar na meáin shóisialta agus páirt a ghlacadh sa gcomhrá mór Gaeilge a bheidh ar siúl idir seo agus Oíche Shamhna.
D’éirigh chomh maith sin le #Gaeiltober na bliana seo caite gur spreagadh Gaeil na hAlban a leagan féin den fheachtas a thosú an mhí dar gcionn agus #Gaelvember a chur ar bun. Níl aon chaint go fóill ar ‘Gaelvember 2020’.
