‘Is beag an tionchar a bheidh ag Musk ar Twitter na nGael’ – Scannell

Ní mheasann an tOllamh Kevin Scannell go mbeidh tionchar mór ag Elon Musk ar Twitter na Gaeilge “ó dhearcadh an ghnáthúsáideora”. Tuairiscíodh níos luaithe an tseachtain seo gur aontaigh bord Twitter glacadh le tairiscint Elon Musk, príomhfheidhmeannach Tesla agus an fear is saibhre ar domhan, an suíomh meán sóisialta a cheannach ar $44b (€41.8b). Cé go bhfuil amhras á chaitheamh ar an margadh idir Musk agus Twitter le 24 uair an chloig anuas, níl aon athrú plean fógartha ag an bhfear é féin go dtí seo. 

Coinníonn Kevin Scannell súil ghéar ar fhás agus ar fhorbairt na Gaeilge ar an idirlíon, agus is minic a chuireann sé fíricí agus eolas ar fáil faoi úsáid na Gaeilge ar Twitter. Tá plé bríomhar ar bun ar na meáin shóisialta agus ar na meáin thraidisiúnta le cúpla lá anuas faoi na hathruithe a d’fhéadfadh Musk a chur i bhfeidhm ar an suíomh agus an tionchar a bheadh aige sin ar chúrsaí polaitíochta agus ar shaol na ngnáthúsáideoirí. 

Tá fadhbanna móra ar Twitter leis an gciníochas agus an fuathchaint agus tá lucht an Bhéarla buartha gur in olcas a ghabhfaidh sé sin agus fear Tesla i gceannas ar chúrsaí. Níl an tOllamh Scannell chomh buartha céanna faoi sin i gcás phobal na Gaeilge ar Twitter, cé go n-aithníonn sé go bhfuil fadhbanna móra ann ar an suíomh trí chéile. 

“Is é mo thuairim nach mbeidh tionchar mór ag Musk ó dhearcadh an ghnáthúsáideora. Deir sé gur mhaith leis saoirse cainte a chosaint, ach tá an suíomh lán go béal de chiníochas, fuathchaint, agus drochíde de chuile shórt cheana féin. Is annamh a fheicimse pionós níos measa ná cosc 24 uair an chloig nuair a dhéanaim gearán ar a leithéid. Buíochas le Dia, níl na fadhbanna chomh dona sin i measc phobal na Gaeilge, agus déarfainn go mbeidh cúrsaí mar an gcéanna, a bheag nó a mhór, faoin réimeas nua. Ach is maith an scéalaí an aimsir!” a dúirt Kevin le NÓS. 

Tuairiscíodh inniu ar The Guardian inniu go bhfuil go leor daoine atá ar an eite chlé ó thaobh na polaitíochta de tar éis na mílte leantóirí a chailleadh ó fógraíodh an margadh gnó ag tús na seachtaine agus go bhfuil go daoine atá ar an eite dheas tar éis na mílte leantóirí nua a aimsiú agus daoine ag clárú agus ag díchlárú leis an suíomh i bhfianaise na nuachta. Ní léir go fóill an raibh nó an mbeidh tionchar ag ceannachán Musk ar líon na ndaoine a bhíonn ag giolcaireacht i nGaeilge