Bhí tionchar mór ag an gcluiche Foclach ar úsáid na emoji ar na meáin shóisialta i measc cainteoirí Gaeilge i mbliana. Dúirt an tOllamh Kevin Scannell ó Ollscoil Missouri le NÓS go bhfuil “borradh mór” faoi na emoji ☘️💛
⬛ agus araile mar gheall ar chainteoirí Gaeilge a bheith ag roinnt thorthaí a n-iarrachtaí sa gcluiche focal ar Twitter.
D’imir an cogadh san Úcráin tionchar mór ar staitisticí na bliana seo freisin agus bratach na tíre sin go mór in úsáid ag idir ghnáthdhaoine ag tacú le muintir na hÚcráine, pholaiteoirí agus rialtais ar fud an domhain ag scaipeadh teachtaireachtaí faoin gceist, agus eagraíochtaí nuachta agus iriseoirí ag tuairisciú ar an gcoimhlint in oirthear na hEorpa.
Is dream thar a bheith moltach iad na Gaeil ar líne más féidir aon tátal a bhaint as a mhinice is a bhíonn an emoji 👏 ina gcuid teachtaireachtaí ar líne. Seo an ceathrú bliain as a chéile atá an emoji ‘bualadh bos’ ar bharr an liosta atá curtha ar fáil ag an Ollamh Kevin Scannell do NÓS.
Déantar ceiliúradh chuile bhliain i mí Iúil ar Lá Idirnáisiúnta na Emoji agus tá taighde á déanamh ag Kevin le blianta beaga anuas ní hamháin ar úsáid na Gaeilge ar líne ach ar úsáid na emoji i measc lucht labhartha na Gaeilge ar na meáin shóisialta. Rinne sé scagadh ar úsáid na emoji i measc cainteoirí Gaeilge Twitter agus chuir liosta le chéile den 100 emoji is coitianta.
Ar bharr an liosta sin arís eile tá an ‘bualadh bos’. Athraíonn brí na emoji in imeacht na mblianta agus is minic a thugtar brí as nua do emoji ar leith. San am a caitheadh d’úsáidtí an ‘bualadh bos’ le béim a leagan ar theachtaireacht ach tá an nós sin imithe i léig beagán anois cé go bhfeictear fós é ó am go chéile. Mar a bheifí ag súil, is le moladh a thabhairt do dhuine is mó a úsáidtear an ‘bualadh bos’ ar na meáin shóisialta.
Tá na giolcacha poiblí go léir a seoladh ó chuntais phoiblí Twitter bailithe ag Scannell mar chuid den togra ‘Indigenous Tweets’, agus is ón mbailiúchán sin a tháinig sé ar an 50 emoji is mó úsáid ag cainteoirí Gaeilge ar Twitter.
Bhí an bhogliathróid Mheiriceánach 🥎 agus an eitpheil 🏐 go hard ar an liosta freisin mar gheall ar an úsáid a bhaintear astu agus trácht á déanamh ar na cluichí Gaelacha. Dúirt Kevin gurb é cuntas TG4 is mó a úsáideann an bhogliathróid i leaba an sliotair agus an eitpheil i leaba na peile Gaelaí.
Tá tionchar níos mó fós ag Cumann Lúthchleas Gael ar úsáid na emoji ar Twitter agus na ciorcail dhaite in úsáid ag daoine lena dtacaíocht a léiriú d’fhoirne CLG na tíre. Go deimhin, tá dathanna CLG chomh haitheanta sin faoin am seo go n-úsáidtear iad le contaetha a chur in iúl fiú nuair nach bhfuil aon spórt i gceist.
Tá an ‘tÉireannachas’ le feiceáil ar an liosta agus brat na hÉireann 🇮🇪, an tseamróg ☘️, agus an tseamair Mhuire le feiceáil ann. Is iad bratach Mheiriceá agus bratach na hÚcráine an t-aon dá bhratach eile atá ar an liosta 100 emoji i mbliana ach deir Kevin gur úsáideadh bratach an Chósta Eabhair
deich n-uaire i ngiolcacha Gaeilge le bliain anuas.
Níl an tóir chéanna ar na hemoji a bhaineann leis an grípa an Dream Dearg i mbliana ach tá an ‘ciorcal mór dearg’, ‘an ciorcal dearg’ agus ‘an fhuilghrúpa O’ fós ar an liosta.
Ar údar éigin tá an clog aláraim sa gcúigiú háit ar liosta na bliana seo.
