D’fhógair Netflix an tseachtain seo caite go mbeidh an comhlacht sruthaithe agus trí eagraíocht bundúchasach i gCeanada ag obair as lámha a cheile le “tallann scáileáin” a chothú agus a fhorbairt.
Fógraíodh an togra nua ag Féile Domhanda na Meán in Banff Dé Mairt seo caite. Is mar chuid de ghealltanas $25m a rinne a Netflix beagnach dhá bhliain ó shin infheistíocht a dhéanamh sa gcéad ghlúin eile de lucht déanta scannán agus cláracha i gCeanada sna blianta amach romhainn.
Beidh Netflix ag obair le imagineNATIVE, The Indigenous Screen Office, agus Wapikoni Mobile le hábhar i dteangacha dúchais Cheanada a fhorbairt. Beidh Netflix ag tabhairt tacaíochta do phobal Fraincise Cheanada agus do scannánóirí ban mar chuid den togra nua freisin.
Tá institiúid ag imagineNATIVE agus reáchtálann an eagraíocht féile scannán g ach bliain in Toronto. Roinnfear an maoiniú a gheobhaidh an eagraíocht thar shé mhiontogra éagsúla, a bheidh dírithe ar scríbhneoirí scannán, stiúrthóirí agus léiritheoirí ó phobal bundúchasach Cheanada.
Beidh The Indigenous Screen Office ag úsáid an airgid ó Netflix le tacaíocht bhreise a thabhairt do thograí atá tosaithe cheana féin, ina measc meantóireacht chultúrtha do stiúrthóirí, léiritheoirí agus scríbhneoirí scripte.
Is eagraíocht í Wapikoni Mobile a thaistilíonn ar fud fad Cheanada ag cabhrú leis an óige i bpobal bhundúchasacha foghlaim faoi chúrsaí scannánaíochta.
Tá airgead curtha ar fáil freisin ag Netflix, i gcomhpháirt le Telefilm Canada agus Canada Media Fund, le cláracha Fraincise a fhorbairt do lucht déanta scannán agus cláracha taobh amuigh de Québec.
Dúirt stiúrthóir polasaí poiblí Netflix i gCeanada, Stéphane Cardin, gur léiriú é an togra nua go bhfuil “an éagsúlacht agus an cuimsiú” ina gcroíchuid de Netflix agus an rath atá ar an gcomhlacht mór.
Dúirt urlabhraí de chuid an chomhlachta le NÓS an tseachtain seo caite nach bhfuil sé i gceist acu cláracha ná scannáin i nGaeilge a chruthú faoi láthair, mar a éilítear in achainí a scaipeadh ar líne níos luaithe an mhí seo.
Thug an t-urlabhraí le fios go bhfuil roinnt Netflix Originals déanta ag an gcomhlacht in Éirinn, ina measc The Siege of Jadotville, Nightlyers, Flinch, agus an clár faisnéise a eisíodh i mbliana faoin slad a rinneadh ar an Miami Showband le linn na dTrioblóidí.
Faoi láthair, níl aon chlár ná scannán i nGaeilge ar fáil ar Netflix, cé go bhfuil leagan Béarla den tsraith iomráiteach An Klondike, faoin teideal Dominion Creek. Nuair a thairg stiúrthóir na sraithe, Dathaí Keane, an rogha idir fotheidealú agus dubáil do Netflix, ghlac an comhlacht leis an leagan dubáilte.
