Cearta trasinscne, cannabas agus eile á bplé ar ‘Turas Bóthair’ TG4

Beidh an clár iomráiteach Turas Bóthair ag filleadh ar TG4 don tríú sraith an mhí seo chugainn mar chuid de sceideal an Fhómhair ar an stáisiún Gaeilge. Bhí an-tóir go deo ar shraitheanna a haon agus a dó den chlár cainte agus beidh sé eagrán úr nua á gcraoladh sna seachtainí amach romhainn. 

Ba i nDún na nGall, i gCiarraí, i nGaillimh, i Maigh Eo, in Aontroim agus i nDoire a taifeadadh cláracha na sraithe seo agus beidh gnéithe den “lúcháir agus brón”, den “ghrá agus briseadh croí”, den “chairdeas agus rómánsaíocht” agus den “éadóchas agus dóchas” á iniúchadh lena linn. 

“Cluinfimid scéalta pearsanta agus gheobhaimid amach cad é an dearcadh atá ag an mhuintir sna carranna ar réimse leathan ábhar: an grá, caidrimh, gnéas, teicneolaíocht, tinneas, cearta na mban, agus cuid mhór eile,” a gheallann lucht déanta an chláir. 

Sa gcéad chlár den tsraith nua, breathnófar ar cheisteanna atá go mór i mbéal an phobail i láthair na huaire, cearta trasinscne agus tairbhe an ola cannabais ina measc. Pléifear roinnt teoiricí comhcheilge ann freisin. 

Ar na hábhar eile a bheidh faoi chaibidil i rith an chuid eile den tsraith beidh: cúrsaí teaghlaigh,an pósadh agus an colscaradh agus teaghlaigh aontuismitheora; an comhshaol; toitíní leictreonacha; an feachtas #MeToo agus an cearrbhachas ar líne. 

Ar na haíonna a bheidh ar an scáileán i mbliana beidh Órla agus Conall a bhíonn ag obair le chéile i mBéal Feirste, Allanah agus Cara as cathair Dhoire, Seán Breandán agus Seáinín i gContae Chiarraí, Muiris agus Gabriel as an gcontae céanna agus na ceoltóirí tíre Michael agus John i nDún na nGall. 

Craolfar an chéad chlar de Turas Bóthar ar TG4 Déardaoin an 5 Meán Fómhair ag 20.00.