‘Ná bí buartha mam, tá chuile rud go breá’
'Fógra Gaeilge' ag Vodafone

Táthar ag moladh an chomhlachta Vodafone ar na meáin shóisialta as an nGaeilge a úsáid ar bhealach nádúrtha ina fhógra nua teilifíse a craoladh den chéad uair an tseachtain seo caite. Feictear sa bhfógra cailín óg agus í ar a céad thuras as baile chun na Gaeltachta.

Cuireann an cailín síos ar an áit “atá ar nós na gealaí” agus ar an aimsir fhuar fheannta atá ag cur isteach uirthi i dtéacs a sheolann sí chuig a máthair. Ach nuair a ghlaonn an mháthair uirthi le fáil amach an dteastaíonn uaithi dul abhaile ón gcoláiste samhraidh, ach deir sí lena máthair gan a bheith buartha agus go bhfuil “chuile rud go breá”. 

Dúirt tráchtaire amháin ar Twitter go léiríonn cinneadh Vodafone an Ghaeilge a úsáid sa bhfógra go bhfuil “fiúntas agus éifeacht” ag an gcur chuige dátheangach “nuair a dhéantar go cliste é” agus cheistigh an fáth nach mbaineann comhlachtaí Éireannacha leas níos mó as an nGaeilge ina gcuid-ne fógraíochta. 

Dúirt duine de bhunaitheoirí an Pop Up Gaeltacht, Osgur Ó Ciardha, go bhfuil “doimhneacht faoi leith” ag baint leis an bhfógra Gaeilge agus go dtugann an Ghaeilge “barántúlacht áitiúil” do chorparáidí idirnáisiúnta ar nós McDonald’s, Vodafone agus Kia. 

Bhíothas ann, áfach, a bhí den tuairim nach raibh sa bhfógra nua ach “cleas suarach margaíochta” ag an gcomhlacht idirnáisiúnta “cuma dhúchasach” a chur orthu féin gan tacaíocht cheart a thabhairt do thairgeoirí Éireannacha, agus gur “sop in áit na scuaibe” an méid sin.

Ar ndóigh, ní hé seo an chéad uair a d’úsáid comhlacht mór idirnáisiúnta an Ghaeilge mar chuid dá fheachtas margaíochta. Tá cáil mhór ar fhógra Carlsberg a bhí ann os cionn deich mbliana ó shin a thug an ‘nath cainte’ “ciúnas bóthar cailín bainne” isteach sa gcúrsaíocht. Tá feachtas ar bun faoi láthair ag an gcomhlacht carranna Kia san ardchathair ina mbaintear úsáid cliste as logainm Gaeilge na cathrach le margaíocht a dhéanamh ar ‘Baile Átha Kia’.