Táthar ag moladh an chomhlachta Vodafone ar na meáin shóisialta as an nGaeilge a úsáid ar bhealach nádúrtha ina fhógra nua teilifíse a craoladh den chéad uair an tseachtain seo caite. Feictear sa bhfógra cailín óg agus í ar a céad thuras as baile chun na Gaeltachta.
Cuireann an cailín síos ar an áit “atá ar nós na gealaí” agus ar an aimsir fhuar fheannta atá ag cur isteach uirthi i dtéacs a sheolann sí chuig a máthair. Ach nuair a ghlaonn an mháthair uirthi le fáil amach an dteastaíonn uaithi dul abhaile ón gcoláiste samhraidh, ach deir sí lena máthair gan a bheith buartha agus go bhfuil “chuile rud go breá”.
Dúirt tráchtaire amháin ar Twitter go léiríonn cinneadh Vodafone an Ghaeilge a úsáid sa bhfógra go bhfuil “fiúntas agus éifeacht” ag an gcur chuige dátheangach “nuair a dhéantar go cliste é” agus cheistigh an fáth nach mbaineann comhlachtaí Éireannacha leas níos mó as an nGaeilge ina gcuid-ne fógraíochta.
Fair plé do @VodafoneIreland as #Gaeilge a úsáid ina bhfógra teilifíse nua. Léiríonn sé go bhfuil fiúntas agus éifeacht ag an gcur chuige dátheangach nuair a dhéantar é go cliste.
— Rónán Mac Niallais (@macniallais) 20 Bealtaine 2018
Dúirt duine de bhunaitheoirí an Pop Up Gaeltacht, Osgur Ó Ciardha, go bhfuil “doimhneacht faoi leith” ag baint leis an bhfógra Gaeilge agus go dtugann an Ghaeilge “barántúlacht áitiúil” do chorparáidí idirnáisiúnta ar nós McDonald’s, Vodafone agus Kia.
Aontaím, tá doimhneacht faoi leith ag baint leis an bhfógra.
Tugann an Ghaeilge barántúlacht áitiúil do chorparáidí idirnáisiúnta. Tá sé seo feicthe ní amháin ag @VodafoneIreland ach ag @McDonalds, @Kia agus eile.@StillwaterComms @FinbarrDBradley https://t.co/T4OOphjYWx
— Osgur Ó Ciardha (@OsgurOCiardha) 20 Bealtaine 2018
Bhíothas ann, áfach, a bhí den tuairim nach raibh sa bhfógra nua ach “cleas suarach margaíochta” ag an gcomhlacht idirnáisiúnta “cuma dhúchasach” a chur orthu féin gan tacaíocht cheart a thabhairt do thairgeoirí Éireannacha, agus gur “sop in áit na scuaibe” an méid sin.
Ní bheinn fhéin ag teacht leis seo. Dar liom go n-úsáideann leithéidí Tesco, Sainsbury's sol an Ghaeilge le cuma dúchasach a chur ar a gcuid siopaí agus ag an am chéanna gan mórán earraí as Éirinn á ndíol acu sna siopaí – sop in áit na scuaibe
— Beirneach (@Beirneach) 20 Bealtaine 2018
Ar ndóigh, ní hé seo an chéad uair a d’úsáid comhlacht mór idirnáisiúnta an Ghaeilge mar chuid dá fheachtas margaíochta. Tá cáil mhór ar fhógra Carlsberg a bhí ann os cionn deich mbliana ó shin a thug an ‘nath cainte’ “ciúnas bóthar cailín bainne” isteach sa gcúrsaíocht. Tá feachtas ar bun faoi láthair ag an gcomhlacht carranna Kia san ardchathair ina mbaintear úsáid cliste as logainm Gaeilge na cathrach le margaíocht a dhéanamh ar ‘Baile Átha Kia’.
