An tseachtain chéanna a d’fhógair an rialtas an dianghlasáil cheart i lár mhí an Mhárta, seoladh seirbhís a chabhraigh go mór linne míonna deacra na paindéime a chur dínn — Disney+. Bhí an-tóir go deo ar na scannáin mhóra atá ar fáil ar an aip — leithéid Star Wars, Marvel Cinematic Universe, agus mórscannáin Disney ar nós Wall-E, Up, The Lion King agus eile.
Bhíothas ar bís nuair a fógraíodh go mbeadh an ceoldráma mór le rá Hamilton ar fáil ar an seinnteoir chomh maith, agus is iomaí clár nua eile atá curtha leis an tseirbhís ó shin.
Ach i bhfolach i measc na gclár úr sin uilig, tá seoda de sheanchartúin ar fáil ar Disney+. Tá ábhar ann a craoladh den chéad uair chomh fada siar le 1928 (Steamboat Willie), ach tá sraitheanna a bhíodh ar The Den agus cláracha eile don óige ar RTÉ fadó freisin.
Seo daoibh ár rogha de na cartúin reitreo is fearr atá ar Disney+
Gargoyles (1994-1997)
Ba í Éire an t-aon áit ar domhan taobh amuigh de na Stáit Aontaithe a craoladh Gargoyles ar an teilifís — ar RTÉ Two in 1997. An cuimhin leat Goliath, Hudson, Broadway, Lexington, Brooklyn agus Bronx? Cuireadh na Geargáilí faoi gheasa in Albain in 994, geis a d’fhág ina gclocha iad ar feadh míle bliain. Dúisíodh arís iad in Manhattan sa bhliain 1994 mar a bhfuil orthu dul i dtaithí ar shaol an fhichiú haois. Tá cuid den scéal fréamhaithe i seanchas Gaelach na hAlban! (Ach tá an ‘blas Albanach’ ar chuid de na carachtair go hainnis!)
Kim Possible (2002-2007)
‘Call me, beep me, if you wanna reach me’. An spiaire déagóra is fearr ar dhroim an domhain! Cén duine againn nach raibh ag iarraidh a bhí ar Team Possible tráth dá raibh? Bhí Kim ina laoch, ach ba é an carachtar ab fhearr linne Rufus an ‘caochfhrancach maol’ — an peata a bhí ag cara Kim, Ron Stoppable. An raibh a fhios agat gurbh í Raven ó That’s So Raven a thug a glór do chara Kim, Monique?
Recess (1997-2001)
An t-aon ‘Recess’ a bhí ar eolas againn sular craoladh Recess Disney ná an baile beag Gaeltachta i nGaillimh! ‘Sos mór’ an t-ainm a bhíodh againn ar ‘recess’ Mheiriceá agus muid ar scoil, ach chuir an clár seo lenár stór focal. Ní thuigfeadh páiste an greann agus an aoir atá sa tsraith faoin tsochaí, an rialtas, agus an t-aicmeachas, ach is fiú go mór don duine fásta breathnú siar air! Tá tagairtí ann don Chogadh Fuar agus polasaithe Gnóthaí Eachtracha Mheiriceá ann, chomh maith le comharthaí aitheantais do scannáin mhóra ar nós The Great Escape agus Cool Hand Luke.
Spider-Woman (1979-1980)
Tá Spider-Woman ar cheann de na carachtair a d’imigh go ciúin ó dhomhan Marvel. Cruthaíodh í ag deireadh na 1970idí mar fhreagra ar shárlaoch eile, Web Woman, nach gcloistear mórán cainte uirthi sa lá atá inniu ann ach an oiread. Níor mhair an tsraith ach séasúr amháin, agus gan ach 16 eagrán ann, ach is sraith dheas í mar sin féin agus blaiseadh láidir de stíl na 1970idí le brath san ealaín agus sa script.
Gummi Bears (1985-1991)
D’éirigh le Disney scéal mór fada a dhéanamh as milseáin! Tá seanchas a shíneann siar cúig chéad bliain agus caint ann faoi na ‘Great Gummis’ a mhaireadh go síochánta taobh leis an gcine daonna, agus scéalta faoi ‘The Knights of Gummadoon’ agus rudaí iontacha eile. B’fhéidir go raibh na munchies ar lucht a chruthaithe nuair a tharraing siad chucu an mála Gummi Bears an lá a tháinig siad aníos leis an smaoineamh don tsraith. Bhain Disney ábhar do 67 clár as na milseáin bheaga agus scaipeadh ar fud an domhain iad. Ba é Gummi Bears a chuir tús leis an rabhartha nua cartún a craoladh ar ‘Disney Afternoon’ Mheiriceá, agus murach iad ní bheadh go leor de na cartúin eile againn.
Chip ’n Dale Rescue Rangers (1989-1990)
‘Ch-ch-ch-ch-Chip ’n Dale!’. Ar tugadh glór níos measa d’aon charachtar riamh? B’fhéidir gurbh fhearr na fotheidil a roghnú don cheann áirithe seo! Ach mar sin féin, bhí an-spórt sa tsraith seo, agus ó tharla go mbíonn tús an scéil agus a chríoch i ngach eipeasóid, gan aon scéalta leanta ó eipeasóid go heipeasóid, is féidir ceann ar bith a roghnú agus fiche nóiméad a chaitheamh ag breathnú air.
