Tá trí phost nua fógartha ag TG4 dá seirbhís úr nuachta. Tá an stáisiún Gaeilge sa tóir ar eagarthóir agus beirt iriseoirí a bheidh ag obair sa rannóg nua a bunaíodh an bhliain seo caite i ndiaidh don Rialtas glacadh leis an moladh go mbeadh soláthar nuachta TG4 neamhspleách ó RTÉ.
Beidh suíomh úr nuachta ag TG4 amach anseo agus is ar an ardán sin chomh maith leis na hardáin dhigiteacha eile a bheidh an nuacht á scaipeadh ag an tseirbhís nua. Is é an t-eagarthóir nua a bheidh freagrach as na scéalta nuachta aimsiú, a bhriseadh, agus a chur in oiriúint do na hardáin sin.
Deirtear ar shuíomh TG4 go bhfuiltear ag lorg duine a bheadh in ann “cur chuige nuálaíoch a chur i bhfeidhm i tdtaobh scéalta físe nuachta a léiriú” agus go mbeidh béim ar “ábhar nuachta gearrfhoirme” ar TikTok, Instagram, agus YouTube.
Ní mór don té a cheapfar “sárthuiscint” a bheith aige ar an nuacht dhigiteach agus a bheith cruinn i “scríobh agus labhairt na Gaeilge”. Caithfidh taithí eagarthóireachta nó iriseoireachta a bheith ag an duine in ábhar scríofa, digiteach, nó craolta chomh maith.
Beidh an bheirt iriseoirí ag obair leis an eagarthóir nua leis an tseirbhís úr nuachta a chur ar fáil. Beidh na daoine sin freagrach as scéalta a aimsiú agus a chur i láthair ar cheamara ar na hardáin dhigiteacha agus suíomh nua TG4 chomh maith.
Ní mór cáilíocht tríú leibhéal san iriseoireacht “nó a chomhionann” a bheith ag na hiarrthóirí ar an dá ról seo agus taithí iriseoireachta éigin acu freisin. Táthar ag lorg daoine a bhfuil “eolas agus tuiscint” acu ar phobal na Gaeltachta agus na Gaeilge agus “na scéalta nuachta a spreagann iad”. Ní mór Gaeilge chruinn, idir scríofa agus labhartha, a bheith ag na hiarrthóirí chomh maith.
Is annamh a thagann deiseanna chun cinn i saol na hiriseoireachta Gaeilge agus tá an fógra seo ar cheann de na fógraí poist is mó a rinneadh in aon bhabhta amháin le tamall anuas. Fostaíodh cúigear nuair a bunaíodh Tuairisc.ie in 2014 ach go hiondúil is ina nduine agus ina nduine a fhostaítear iriseoirí Gaeilge sna seirbhísí eile nuachta.
Tá tuilleadh eolais faoi na folúntais anseo.
