Tá an chéad Luan de mhí Feabhra buailte linn agus tá mise, fiú mura n-aontódh duine ar bith eile liom, ag súil go mór le mí Eanáir a chur taobh thiar dom agus tús a chur leis an earrach.
Stoirmeacha, cúig Luan in aon mhí amháin, dry January (an bhfuil Gaeilge curtha againn air seo fós?), na mianta uilig a rinne muid don athbhliain agus a ndearna muid dearmad orthu cheana. An dtarlaíonn tada maith i mí Eanáir? Bhí cúpla rún leagtha amach agamsa dom féin agus, gan a dhul i bhfad scéil leis, ní dóigh liom gur chloígh mé le hoiread is ceann amháin acu.
Ach cén dochar!
Seo cúpla riail nó rún atá leagtha amach agamsa don mhí amach romhainn agus tá mé ag dul á roinnt libhse – lean iad nó ná lean iad, nó cum do chuid rialacha féin, fágfaidh mé fút é. Agus, ar fhaitíos go gceapfá nach bhfuil aon phionós á ghearradh ag na rúin seo, cuimhnigh go bhfuil an Carghas fós amach romhainn go bhféadfadh muid aithrí a dhéanamh. Beidh sé ag tosaí ar Lá Fhéile Vailintín freisin, mar bharr ar an donas.
1. Saoire bheag
Théis, seans, an Nollaig a chaitheamh le do mhuintir agus mí mhór fhada Eanáir a chur díot, tá saoire bheag tuillte agat. Le cairde nó leat féin, ceannaigh ticéad bus nó traenach nó léim isteach i gcarr agus téirigh ag speiceáil thart in áit éicint nua.
2. Pancóga
Plúr, ubh, bainne. Sin é an méid a theastaíonn. Réitigh pancóga. Ná bac le seacláid. Cuir ruainne líomóide agus siúcra air. Ith é. (Ní gá é seo a dhéanamh ar Lá na bPancóg ach oiread.)
3. Ceannaigh leabhar agus léigh é
I ndáiríre ní gá duit leabhar a cheannach fiú. Faigh ar iasacht é. Níl aon chál leabhar mór trom a cheannach toisc gurb é an ceann atá á fheiceáil agat ar na meáin, mura bhfuil sé i gceist agat é a léamh. Faigh rud éigin éadrom agus léigh cúpla leathanach sa ló. Beidh sé críochnaithe agat roimh i bhfad!
4. Scannán
Tá séasúr bronnta na nduaiseanna faoi lán seoil agus chuile bhliain ag an am seo bliana, airím go hiomlán as an eolas mar bíonn chuile dhuine ag caint faoi na scannáin seo uilig nach bhfuil feicthe agam. Agus má tá tusa ar dhuine de na daoine sin a bhfuil chuile scannán beo a tháinig amach in 2023 feicthe acu cheana féin – breathnaigh ar cheann éicint eile. (A luaithe is a oibrím amach cén chaoi ar féidir liom breathnú ar scannán Kneecap, tá mé le hiachall a chur ar mo dheartháir breathnú air in éineacht liom.)
5. Déan nós agus bris é
Téigh i gcoinne an tseanfhocail. Tá a nósanna féin ag chuile dhuine agus iad ag dul i mbun lá oibre. Bíodh siad maith nó olc. Déan rud éicint nua agus bris do nós – tóg bealach nua le dul chun na hoibre, réitigh rud éicint difriúil don bhricfeasta, cuma céard é féin a fhad is gur rud nua dhuitse é.
