Tá seirbhís úr do mhuintir Bhaile Átha Cliath a ligfidh d’úsáideoirí téacs a sheoladh agus aon rud ar mhaith leo a fháil seachadta chuig a ndoras.
Bunaithe ar choincheap a cruthaíodh sna Stáit Aontaithe timpeall bliain ó shin, is féidir le muintir na hArdchathrach uimhir ghutháin agus cárta creidmheasa a chlárú le ‘Text Dan’, agus as sin ar aghaidh iarratas a sheoladh ag aon am.
Níl tú ag iarraidh do chuid siopadóireachta a dhéanamh? Gheobhaidh Dan duit é.
An ndearna tú dearmad bronntanas a fháil do bhreithlá do Mhamaí? Seol téacs chuig Dan.
Dar lena suíomh gréasáin, tá foireann oibrithe ann a ghlacfaidh le do théacs agus a chuirfidh ar aghaidh é chuig seachadóir sa chathair.
Tá sé saor in aisce teagmháil a dhéanamh le Dan ach gearrtar táille breise ort as an tseirbhís a úsáid.
Níl an tseirbhís ag feidhmiú go fóillín ach is féidir le húsáideoirí clárú ag textdan.com
