Na comhábhair:
An brioscarán
125g im
55g siúcra mín
200g plúr
An parfait
Sú 3 líomóid agus an craiceann fé ghráta
3 ubh
125g siúcra mín
100ml uachtar
Raimicín x 6
Stán rósta
An gruth sútha craobh
600g sú craobh reoite
1bsp sú oráiste
150g im
250g siúcra mín
4 ubh
Mús seacláide báine
150ml uachtar
150g seacláid bhán
1 gealachán uibhe
Teocht an oighinn @ 160c.
Na Brioscaráin:
Measc an siúcra agus an t-im le chéile le spúnóg adhmaid nó próiseálaí bídh. Cuir an plúr leis agus measc go mbeidh cuma grabhróg aráin air. Ansan, caith amach ar an gcuntar é agus tabhair an meascán le chéile le do lámha. Nuair atá taos deas agat rolláil amach go mbeidh cuma ispín air. Clúdaigh le scannán cumhdaithe agus fág sa chuisneoir ar feadh 45 nóiméad. Gearr ina shliseanna deas tanaí. Bácáil @ 200c/180c fean go ceann 10-12 nóiméad go mbeidh dath deas órga orthu. (Gheobhaidh tú 16 bhriosca as an oideas seo ach is féidir iad a bheith déanta roimh ré agus iad a choimeád i mbosca aerobach).
An Parfait:
Buail an sú líomóide, na craicne líomóide, na huibheacha agus an siúcra le chéile i mbabhla go dtí go mbeidh an siúcra leáite. Cuir an t-uachtar leis agus measc go maith iad. Dein an t-iomlán a chriathrú go mbeidh meascán deas mín agat. Cuir na raimicíní isteach i stán. Doirt 50ml den mheascán isteach sna raimicíní. Leathlíon an stán rósta le huisce beirithe. Cócaráil san oigheann go ceann 45 nóiméad @ 160c. Lig dóibh fuarú go ceann tamaill.
An Gruth Sútha Craobh:
Téigh na sútha craobh agus an sú oráiste i bpota go ceann 5 nóiméad ag suanbhruith. Ansan, dein criathrú ar an meascán isteach i bpota nua. Caith uait na síolta, níl uait ach an sú. Cuir an siúcra leis an sú agus lig dó leá. Cuir an t-im leis, píosa ar phíosa, ag meascadh an t-am ar fad ar theas íseal. Bris 4 ubh i mbabhla eile agus buail le chéile iad. Bí cinnte nach bhfuil teocht an phota ró ard, is féidir é a bhaint ón dteas aon uair. Caith isteach na huibheacha leis an meascán agus corraigh go dian. (Arís, más dóigh leat go bhfuil an pota ró thé…ana-sheans go bhfuil! Bain den dteas é agus lig dó fuarú go ceann tamaillín!) Ramhróidh an t-iomlán de réir a chéile ar nós custaird. Tógfaidh sé seo timpeall 10 nóiméad. Coimeád siar cuid don mhilseog. (Gheobhaidh tú próca deas ón oideas seo, 3 lá sa chuisneoir agus coicís sa chófra i bpróca steirilithe).
An Mús Seacláide Báine:
Leáigh an tseacláid i mbabhla. Buail an t-uachtair agus an gealachán. Fill an tseacláid tríd an meascán agus cuir isteach sa chuisneoir go ceann 30 nóiméad.
An Riaradh:
Scaip an gruth timpeall an phláta. Ansin, cuir an parfait agus an brioscarán i lár an phláta agus spúnóg deas den mhús.
(Is féidir siúcra a chur ar barr an parfait agus séidtóirse nó gríoscán a úsáid chun barra deas carmalaithe a chur orthu).
Neam neam!
