Clár dátheangach ag Féile Bia Dhaingean Uí Chúis den chéad uair riamh

Bíonn blas ar an mbeagán, agus fíorbhlas sa chás seo, agus go deimhin, is blaiseadh a gheobhaidh tú agus tú ag gabháil ó áit go háit ag Féile Bia Dhaingean Uí Chúis i mbliana ar an gCosán Bídh. 

Táim féin chun tosnú Dé Sathairn leis an Baileys Espresso Shot i gcaifé Bean in Dingle chun tús fuinniúil a chur le mo lá ag blaistínteacht ar fud an bhaile. Is mó greim a bhlaisfear Dé Sathairn agus Dé Domhnaigh seo chugainn. Tá na scórtha ionad ar fud an bhaile ag soláthar smeathán, ar nós an Snickers atá domhainfhriochta, uaineoil ón nGráig, oisrí le tabasco agus bosca lóin Mhicilín Muc. Deir an coiste go n-íosfar céad míle smeathán ar fad i rith an dá lá. Amplóirí mínádúrtha amach is amach a bheidh ionainn. Ó, bheadh uisce le d’fhiacla ag cuimhneamh air.

Tá an fhéile seo ar cheann de na féilte is fearr ar domhan, im’ thuairim. Níl aon deireadh leis an rogha bídh, beorach, fíona, manglaim agus eile atá ar fáil. Bíonn na scórtha seastán breactha ar fud shráideanna an Daingin le linn an dá lá, agus daoine ag ceannach chun go mbeadh a gcuisneoir lán ar feadh a seachtaine ina dhiaidh. 

Is breá liom féin seastán Man of Aran Fudge. Ó a Dhia, an ceann miontais nó an ceann sú talún. Bíonn sé go haoibhinn ar fad, agus bús Gaolainne ag an ndíoltóir. Bíonn mórán sráideanna ar an mbaile oscailte do choisithe agus cead a gcos ag an slua siúl timpeall ar a socracht. 

Is í an t-aon fhadhb atá leis an bhféile ná go mbuaileann tú le an iomarca daoine ar fad ná facaís b’fhéidir le dhá bhliain nó trí agus bíonn bús cainte agat agus leath an lae meilte ort ag cadráil faoi cad tá blaiste agat is cad ná blaisis fós! Táim chun mo cheann a chur fúm i mbliana agus an deireadh seachtaine a thabhairt ag ithe!

Den gcéad uair riamh, beidh clár na féile dátheangach agus imeachtaí á dtionól trí Ghaolainn, ar nós taispeántas cócaireachta ar an Satharn le Denise Uí Bheaglaoi ó lóistín An Riasc. Ní mór féile seachtaine a bheith ann chun freastal ar gach aon ócáid. Sin é an taobh go gceart duit na ceardlanna san a chur in áirithint anois, chun ná caillfeá do spás. 

Tá an Dingle Druid, Julí Ní Mhaoileoin, chun ceardlann luibheanna a bheith aici, agus eolas le roinnt aici faoi na luibheanna is fearr a dheineann cógais leighis. Is diail an mheabhair chinn atá ag bean Bhaile an Ghóilín agus oideachas ann féin a bheith ag éisteacht léi. 

Ócáid a mheallann na céadta gach oíche Aoine, nuair a bhíonn an t-ól istigh (agus an chiall amuigh) ná an Sing along Social i dtábhairne Dick Macks. Is dócha ná feadair éinne cad a íosfar ar maidin Dé Sathairn tar éis na dí! 

Mar a dúirt Cinnéideach na gCluainte agus é ag caint ar Raidió na Gaeltachta blianta siar aimsir na Nollag, faoi bhroimneach na ndaoine a bheith ag cur leis an dtruailliú aeráide, “daoibhse a bheidh ag dul amach an Nollaig seo, tógaíg bog é!”

Beidh ócáid ana-speisialta ag an bhféile i mbliana nuair a bheidh tinte ealaíne á scaoileadh cois cé mar chuid den bhféile náisiúnta, An Turas Mór. Dé Sathairn idir a 17.00-19.15 a bheidh sé sin ar bun chun fíorchaoin fáilte a chur abhaile roimis an diaspóra.

Ócáid spéisiúil eile ná ceardlann faoin mbeachaireacht a bheidh ar bun ar a 13.30 Dé Sathairn sa Díseart. €10 atá air seo.

Tá oibrithe deonacha á lorg i gcónaí ag an gcoiste, a thabharfadh dhá uair a chloig dóibh Dé Sathairn nó Dé Domhnaigh. Táid an #BLDB á mholadh leis, sé sin, Beir Leat do Bhabhla! Beidh plátaí déanta as duilleoga pailme ar fáil, agus beidh daoine ábalta iad sin a athúsáid, seachas a bheith ag cur plaisteach agus páipéar amú.

Níl anseo ach blaiseadh ana ana-bheag ar fad don bhféile, a bhraitheamar uainn go mór le dhá bhliain. Go n-éirí le Maitiú Seán agus an coiste!