Cupaí atáim chun a úsáid an uair seo seachas graim. Má tá na cupaí speisialta stáin sin ag éinne a úsáidtear chun comhábhair a thomhais le linn bácála, is é seo an t-am an plaisteach a bhaint díobh agus iad a úsáid den gcéad uair!
Fuaireas féin dhá bhabhta mar bhronntanas iad agus táim á n-úsáid níos minicí anois, mar táid fuirist, tapa agus éasca le rinseáil.
Is iad seo scónaí Bhóthar Aonghuis (‘Aon-Aois’ a deirtear)! Chuas ag piocadh sméar inné agus táid flúirseach, rábach agus cliatháin na mbóithre breac leo. Anois an t-am iad a phiocadh sula ngeibheann an diabhal cuil ghorm chucu.
2 cupa plúr bán speilte
Spúnóg mhór púdar bácála
¼ spúnóg salainn
1/3 cupa íle cnó cócó/im Chiarraí
¼ cupa síoróip mhailpe
1/3 cupa uisce bog
1 cupa sméara dubha
Ubh/íle cnó cócó le smearadh ar barra
Cuir páipéar bácála ar mhias don oigheann agus ardaigh teocht an oighinn go 175°C
Measc na hábhair thirime le chéile i mbabhla mór.
Leáigh an t-íle/an t-im i bpota ar theocht íseal ar an sorn.
Measc an t-uisce bog, an tsíoróip agus an t-íle/an t-im leis an stuif thirim agus measc na sméara isteach go cúramach. Beidh dath aoibhinn ar an meascán.
Ní gá an taos a smearadh ar an gcuntar, ach sé cinn do bhlúirí taois a smearadh ar an bpáipéar bácála, agus blúire íle cnó cócó leáite nó ubh (buailte) a smearadh ar bharra na haon scóna.
Cuir san oigheann é ar feadh 20 nóiméad agus lig dóibh fuarú ar thráidire le haer faoi.
Ní ardóidh siad seo puinn, toisc gur speilt atá in úsáid, agus ní gá iad a ghearradh i dhá leath chun iad a ithe, fiú, ach iad a alpadh siar as do dhorn!
Go haoibhinn 🙂
