Plúr na putóige!
& muiríní deasa ar a bharr

Aodh Ó Corcráin ina chónaí i dtuaisceart Thír na mBascach, áit a bhfuil sé i mbun gníomhaíochta, agus cócaireachta, i mbaile beag cósta. Gach seachtain cuireann sé oideas ar fáil do léitheoirí NÓS agus d’éisteoirí Raidió na Life – is féidir éisteacht lena mhír bhia ar chlár maidine an stáisiúin, An Bricfeasta Blasta, anseo thíos. Inniu tá ceann de phríomhtháirgí na hÉireann aige dúinn, putóg dhubh!


Bhí seans agam bia as ár dtír féin a ullmhú do ghrúpa Bascach an tseachtain seo caite as siocair gur tháinig mo mháthair ar cuairt chugam go Euskal Herria agus, mar a dhéanann máithreacha na hÉireann, thug sí neart bia ón bhaile léi!

Tugadh cuireadh dúinn freastal ar oíche a bhí á reáchtáil ag an chumann gastranómachais chun togha agus rogha bhia na hÉireann a chócaráil do na haficionados Bascacha seo.

Le scéal fada a dhéanamh gairid, bhí dúil mhór acu i bputóg dhubh s’againne agus dúirt cuid acu go raibh sé níos fearr ná a gcuid féin – rud iontach conspóideach ar fad do Bhascach a bheith á rá!

Seo oideas daoibh mar sin don phutóg dhubh, le muiríní, mar a rinne mé é do na Bascaigh – blaiseadh de scoth an bhia atá ar fáil idir mhuir agus shliabh in Éirinn.



Na comhábhair:

– Putóg Dhubh
– Muiríní (scallops)
– Uisce Beatha
– Uachtar

Frioch an phutóg dhubh ar dtús ag déanamh cinnte nach bhfágann tú rófhada á friochadh mar ba mhaith leat í a bheith deas bog sa lár.

Cuir an phutóg ar leataobh agus frioch na muiríní agus bí iontach cúramach.

Ach an oiread leis an phutóg, níor mhaith leat iad a chócaráil a bharraíocht!

Bomaite an taobh agus chan níos faide.

Úsáid an friochtán céanna chun an t-uisce beatha a dhó.

Leathghloine (agus gloine don chócaire!) isteach san fhriochtán te.

Cuir tuilleadh teasa leis agus lig don alcól dó.

Nuair atá an t-alcól imithe, bain den teas é agus measc an t-uachtar isteach leis.

Cuir gach rud le chéile leis an sú thart air.

Dá mba mhian leat an pláta seo a dhéanamh mar phríomhchúrsa, molaim cál/cabáiste agus prátaí bruite a chur leis.

Bainigí sult!


Bíonn An Bricfeasta Blasta ar siúl ar Raidió na Life, Luan go hAoine, ar 8rn-9rn agus bíonn Aodh le cloisteáil gach Céadaoin.