Stobhach Gaelach breá blasta
Leideanna lena dhéanamh i gceart

Tá Aodh Ó Corcráin ina chónaí i dtuaisceart Thír na mBascach, áit a bhfuil sé i mbun gníomhaíochta, agus cócaireachta, i mbaile beag cósta. Gach seachtain cuireann sé oideas ar fáil do léitheoirí NÓS agus d’éisteoirí Raidió na Life – is féidir éisteacht lena mhír bhia ar chlár maidine an stáisiúin, An Bricfeasta Blasta, anseo thíos. Inniu roinneann sé a chleasa chun stobhach a dhéanamh…


Ní hí seo an chéad uair ar labhair mé faoi dhinnéar pobail ar NÓS – féach anseo.

Ach bhí mé spreagtha arís eile ag an traidisiún breá seo an tseachtain seo caite agus mé ag féile áitiúil anseo i dTír na mBascach.

Agus mé ag amharc thart orm, 200 duine ag ithe agus ag ól le chéile, an ceol á bhualadh go hard ag seinnteoirí na háite, shíl mé liom féin: “Gan dabht is féidir linn seo a dhéanamh, agus a shárú, ar ais in Éirinn.”

Agus caidé an bia a chuirfeadh muid ar fáil dá dtarlódh a leithéid?

Stobhach Gaelach dár ndóigh!

Bia an phobail agus furasta le roinnt amach i measc na gcéadta.

Anois, seo an chonspóid – tá mé fá choinne cleasannaí an stobhaigh a roinnt libh, agus tá a fhios agam go mbeadh gach seanmháthair agus máthair amuigh ansin do mo cháineadh.

Ach, seo daoibh, na cleasannaí is fearr chun stobhach maith a dhéanamh.



Tosaigh leis an fheoil
Is minic a bhí mairteoil mhionaithe agam i mBéal Feirste agus is dócha, mar gheall ar rud amháin nó rud eile, gur sin mar a dhéanann siad é go minic sa chathair.

Ach is maith liom féin filleadh ar na sean-nósanna agus muineál uaineola a úsáid.

Bíonn blas níos fearr air tar éis na cócaireachta, dár liom.

Guinness nó gan Guinness?
Creidim go dtugann an leann dubh blas ar leith don mhias agus gur fiú é a úsáid, ach déanfaidh stoc maith uaineola an jab fosta nó fiú fíon geal.

Comhábhair
– Oinniún
– Meacan dearg
– Feoil
– Prátaí.

Sin é. Gan ghairleog. Déan é ar an tsean-dóigh shimplí.

Luibheanna
Ní úsáidim iad, marós (rosemary) ach go háirithe, tá sé ró-láidir.

Rud beag tíme más maith leat, ach níor cheart go mbeadh stobhach ‘aramatach’.

Ach ag an deireadh, is maith liom rud beag peirsil úr a chaitheamh thart air.

Am
2 uair a chloig san oigheann.

Fág thar oíche é. Téigh suas é an lá dár gceann – níl dóigh ar bith eile lena dhéanamh.

stobhach-2

An rún
Anois, an cleas is fearr a d’fhoghlaim mé riamh.

Agus dár ndóigh is Gael a thug an leid seo domh.

Agus an stobhach déanta agat, déan pota beag de phrátaí bruite, gan im nó bainne.

Cuir na prátaí isteach sa stobhach agus déanfaidh sé an rud ar fad i bhfad níos tibhe.

Sin daoibh mo chuid cleasannaí fá choinne stobhach breá a dhéanamh don phobal ar fad.

An bhfuil cleasannaí ar bith agaibhse? Ba mhaith linn iad a cloisteáil!


Bíonn An Bricfeasta Blasta ar siúl ar Raidió na Life, Luan go hAoine, ar 8rn-9rn agus bíonn Aodh le cloisteáil gach Céadaoin.