Cén Ghaeilge atá ar ‘bimbo’? – cuntas nua Instagram do ‘áilleagáin’

Tá cuntais nua ar na meáin shóisialta cruthaithe ag an mbanríon draig Kitty Ní Houlihán a bhfuil sé mar aidhm acu “a thaispeáint do dhaoine gur féidir a bheith gafa le gach rud atá baineann agus nach mbainfeadh sé sin de chlisteacht duine”. 

“Gaeilge d’Áilleagáin is ainm don chuntas. Ní chloistear an focal chomh minic sin, ach ciallaíonn sé rud éigin atá álainn ach nach bhfuil chomh cliste sin. Is dóigh linn gur leagan deas Gaeilge é do ‘bimbo’ an Bhéarla. Tá an-tóir ar gach rud ó na 2000idí arís anois agus tá Paris Hilton agus an focal ‘bimbo’ i mbéal an phobail arís. 

“Theastaigh uainne an focal sin a úsáid le taispeáint gur féidir a bheith gafa le gach rud atá baineann agus nach mbainfeadh sé sin de chlisteacht duine. Agus fiú mura mbíonn tú róchliste is féidir a bheith bródúil as do bhandacht,” a dúirt Kitty le NÓS. 

View this post on Instagram

A post shared by Gaeilge d’áilleagáin 💋 (@ailleagram)

Tá Kitty ina banríon draig le tuairim is bliain anois, agus tá sí tar éis roinnt mhaith leantóirí dá gcuid féin a mhealladh ar na meáin shóisialta. Ba í a d’eagraigh an chéad seó draig i nGaeilge anuraidh agus úsáideann sí ealaín an draig leis an nGaeilge a chur chun cinn ar na hardáin éagsúla. Tá sí féin agus cara léi, Adelina as an Moldóiv, i mbun an na gcuntas ar Twitter agus Instagram.

“Cloisim go minic ó dhaoine gur ‘bhreá leo [a gcuid] Gaeilge a fheabhsú’, ach go mbaineann gach rud faoin nGaeilge le cultúr na hÉireann. Tá mé féin ag foghlaim cúpla teanga eile, agus nuair a bhí mé ag foghlaim na Spáinnise theastaigh uaim Drag Race España a fheiceáil. Bhí mé ag iarraidh rudaí a raibh spéis agam féin iontu a fheiceáil sa teanga nua. 

“Bhíomar ag iarraidh rudaí bándearga a thabhairt do phobal na Gaeilge. Is píosa spraoi atá sa leathanach, agus cuireann muid suas rudaí ar nós seanfhocal ‘nua’ agus téarmaíocht a bhaineann le rudaí nach bhfeictear mórán sa Ghaeilge – an astralaíocht mar shampla. 

“Bíonn pobalbhreitheanna againn – an ‘Meh nó Te?’ – agus bítear ag vótáil orthu sin. Is breá liomsa na ‘Hot or Nots’ agus na ‘Best Dressed/Worst Dresseds’ i dteangacha eile agus is dóigh liom go gcabhraíonn a leithéid go mór le daoine an Ghaeilge a fhoghlaim. Is féidir leo cúpla focal nua a fhoghlaim gach lá,” a dúirt Kitty le NÓS. 

https://twitter.com/ailleagain/status/1389906486600556545

Tá @Ailleagain ar an bhfód le cúpla seachtain anois agus deir Kitty go bhfuil “aiseolas dearfach” faighte ag an mbeirt riarthóirí faoi.

“Dúirt roinnt daoine liom gurb í seo an chéad uair a d’úsáid siad an Ghaeilge le blianta agus go bhfuil spéis acu sna rudaí a chuireann muid suas. Tá cúpla leathanach eile ann ar nós Mhúinteoir Meg a chuireann rudaí faoi chúrsaí faisin ar Instagram agus ceapaim go bhfuil sé go hiontach go bhfuil rudaí mar seo ann anois,” a dúirt sí. 

Tá súil ag Kitty agus Adelina tuilleadh oibre a dhéanamh ar ‘Gaeilge d’Áilleagáin’ amach anseo agus imeachtaí a eagrú nuair a bheidh an saol ina cheart. 

“Tá muid fós ag obair ar an togra agus níl a fhios againn céard a tharlóidh amach anseo. Ba mhaith linn t-léinte agus rudaí mar sin a chruthú, agus beidh téamaí againn ó am go chéile. An mhí seo beifear ag ceiliúradh ‘AAPI Month’ [Asian American Pacific Islander] i Meiriceá. Níl sé ar siúl anseo in Éirinn, ach beidh muid ag caitheamh solais ar dhaoine de bhunadh na hÁise a bhfuil Gaeilge acu an mhí seo,” a dúirt sí. 

Tá Kitty 21 bliain d’aois agus is as iarthar Bhaile Átha Cliath í. Tá sé theanga aici agus tá sí ina banríon draig Gaeilge le bliain anuas.