Ó bunaíodh na Clubanna Playboy, tá an cine daonna i ndiaidh dul i dtaithí ar eireaball coinín a fheiceáil ar mhná agus tá sé ráite ag cuid mhór fear go bhfuil sé sexyáilte go maith.
Is iomaí fear saibhir a chaith am agus airgead leis na ‘coiníní’ le blaiseadh den tsiamsaíocht a chuireann siad ar fáil.
Táthar ann atá glan in éadan na gcoiníní, ar ndóigh, agus ar bhealach tuigim cén fáth.
Ní thig leat bheith i do choinín má tá tú níos sine ná 25.
Bíonn ar an ghruaig agus ar an smideadh a bheith déanta ar stíl áirithe, agus ní mór an chulaith chéanna a chaitheamh agus a chaitheann na coiníní eile, cluasa agus eireaball san áireamh.
Níl cead ag na coiníní aon tatú a thaispeáint agus níl cead acu ach bróga dubha a chaitheamh agus iad snasta go maith.
Chuirfeadh sé sin brú ar bhean ar bith, is cuma cé chomh hálainn is atá sí, gan a bheith ag trácht orainn féin, gnáthmhná na sráide.
Ní hiad na coiníní seo amháin a mbíonn dúil ag fir iontu.
Aithnítear go forleathan Jessica Rabbit mar réalta bheochana a mheallann na mílte fear, agus in ainneoin nach bhfuil eireaball uirthi féin, thiocfadh leat í a shamhlú mar dhuine de na mná a chuireann uisce le cár na bhfear istigh i dTigh Hugh Hefner.
Anois, ní thig liomsa bheith i mo choinín.
Tá mé níos sine ná 25 agus níl corp agam mar atá ag na mná seo: cosa móra fada, cíocha móra agus tóin ghalánta.
Ach i mo sheomra leapa féin, is mise an t-ardchoinín, bandia na collaíochta.
Is féidir liomsa, agus leatsa, eireaball a chur lenár dtóiníní Gaelacha agus iad a chroitheadh thart faoin seomra leapa.
Is iomaí eireaball atá ar fáil anois le ceannach.
Agus leis an fheisteas seo a ghlacadh chuig an chéad leibhéal eile, is féidir cinn a fháil a bhfuil stopallán tóna (butt plug) ceangailte leo.
Díreach cúpla deoir de bhealadh a chur air, é a chaitheamh faoi mar a chaithfeá gnáthstopallán tóna, agus tá tú réidh le haithris a dhéanamh ar cibé ainmhí is maith leat – coinín, madadh rua, capaillín agus go leor leor eile.
Is iomaí físeán atá amuigh ansin le mná ag caitheamh a leithéide agus iad ag déanamh féinshásaimh nó ag glacadh páirte i gcollaíocht lena bpáirtnéir.
Is dóigh liom nach bhfuil mórán sa difear idir é sin agus na daoine ar maith leo coiléar a chur ar a bpáirtnéirí agus iad a threorú timpeall an tseomra leapa ar iall!
Géilleadh iomlán atá ansin – agus cé mise nó tusa le breithiúnas a thabhairt orthu más rud é go bhfuil siad beirt toilteanach agus sábháilte?
Arís eile, tháinig an abairt sin ar ais chun aigne agam: “Cad é mar a bhíonn a fhios agat nach maith leat rud éigin mura bhfuil sé déanta agat?”
Leis an abairt sin úr i mo cheann, chinn mé go raibh mé chun eireaball a ordú dom féin agus a thriail.
Ach a luaithe is a chuir mé na focail isteach le cuardach a dhéanamh, thuig mé go raibh domhan iomlán amuigh ansin nach raibh mé eolach air!
An raibh mé ag iarraidh a bheith i mo mhadra, i mo chat, i mo chapall nó i mo mhadra rua?
Bhí an iomarca de rogha agam!
Lig mé don airgead mé a threorú agus d’ordaigh mé eireaball madra rua, de thairbhe é bheith ar an cheann ba shaoire ach cuma mhaith air.
Caithfidh mé a admháil go raibh mé iontach tógtha nuair a leaindeáil sé ag an doras agam.
Chuir mé isteach é agus… mhothaigh mé sexy!
Níl a fhios agam cén fáth. Bhí mé liom féin agus ní raibh duine ar bith timpeall le mé a fheiceáil, ach fós féin bhí rud éigin sexyáilte agus cumhachtach faoi phearsa eile a ghlacadh orm féin, fiú más ainmhí a bhí ann.
Bhain mé sult as a bhogadh ó thaobh go taobh, as an fhionnadh a mhothú ar mo chosa nochta agus as an bhrú a chuir sé ar mo thóin chomh maith.
Níl mé a rá go gcaithfinn gach lá é, agus is cinnte nach gcaithfinn ar obair é, ach bhain mé sult as rud éigin difriúil a thriail.
Níor nocht mé don duine eile go fóill é.
Ní hé de dheasca é a bheith cúisiúil ná a dhath – nó is maith go bhfuil a fhios agam nach bhfuil – ach tá rudaí áirithe ann gur mhaith leat iad a choinneáil agat féin, agus is dóigh liom gur seo ceann acu.
Ach nuair a cheoltar an t-amhrán ‘An madairín rua, rua, rua, rua, rua’, déanfaidh mé gáire beag agus mé ag smaoineamh ar m’eireaball féin.
