An gcreideann tú go bhfuil rudaí áirithe i ndán duit agus go bhfuil fáth ann go n-imíonn rudaí eile tharat?
Níl mise really cinnte cad a chreidim ann i ndáiríre. Sílim go bhfuil mé ag creidbheáil níos mó sa chinniúint agus rudaí mar sin agus mé ag éirí níos sine, ach tá rud éigin ionam a deir nach bhfuil aon dóigh le dul i ngleic leis na drochrudaí a tharlaíonn duit.
Ach más sin atá ann, an bhfuil sé chomh holc sin creidbheáil i rudaí díreach le nach ngortóidh siad thú?
Dúradh linn agus muid ar scoil nach féidir suí ar do thóin ar feadh do shaoil ag fanacht go dtarlóidh rud éigin. Bhí ort díriú isteach ar cibé a bhí uait agus gan stopadh go raibh sé agat.
Ach ní raibh a fhios agam riamh cad é a bhí uaim. Bhí daoine thart orm a bhí ag iarraidh a bheith ina ndochtúirí nó ina múinteoirí agus chuir sé eagla orm nach raibh agam ach suim sa Ghaeilge — ní an plean saoil a bhí ag achan duine eile.
Chaith mé cúig bliana de mo shaol ansin ag iarraidh oibriú amach cad a bhí uaim. Mhothaigh mé cineál caillte agus ar ndóigh, bhí mé ag fulaingt go mór le fadhbanna meabhairshláinte agus sin ar fad fosta. Agus mé ag amharc siar ar an tréimhse sin anois, is léir gur mhothaigh mé nach raibh smacht ar bith agam ar mo shaol. Bhí rudaí ag tarlú agus bhí mé ag dul ar aghaidh leofa ach ní raibh mé ag déanamh na rudaí a bhí uaim.
Rinne mé mo dhícheall smacht a choinneáil ar na rudaí a bhí mé ag ithe, an chuma a bhí ar mo cholainn (a bhí iontach míshláintiúil), cad a cheap daoine fúm agus na rudaí sin ar fad nach féidir a bheith faoi smacht iomlán agat agus bhí mé iontach míshásta mar gheall air.
Chuaigh mé fríd cúpla rud anuraidh a léirigh dom nach féidir leat achan rud a choinneáil faoi smacht agus go dtarlaíonn rudaí sa saol seo atá iontach agus rudaí eile atá uafásach agus sin díreach mar atá. Mothaím anois go bhfuil mé ag ligean do rudaí tarlú cibé cén dóigh a dtarlóidh siad den chéad uair agus mothaím go bhfuil an oiread sin saoirse agam anois.
Bíonn orm cur i gcuimhne dom féin anois is arís ligean do rudaí áirithe agus gan a bheith buartha faoi rudaí eile. Ní hé go bhfuil mé go bhfuil mé go hiomlán zen anois ach tá cúrsaí i bhfad níos fearr ná mar a bhí.
Sílim, mar sin, gur mhaith liom a chreidbheáil anois go bhfuil rudaí áirithe i ndán dom le gur féidir liom mo scíth a ligean agus iad ar a mbealach chugam!
