Ar chuala tú clúdach Kings of Leon den amhrán ‘Dancing on my Own’ le Robyn?
Tá sé iontach, agus ceann de na rudaí is iontaí faoi ná nár athraigh siad na forainmneacha.
“I’m in the corner watching you kiss her” – gan ‘her’ a athrú go ‘him’.
Wúúúú!
Nuair a athraítear an forainm is teachtaireacht shoiléir é ón amhránaí – no homo.
Tá sé truamhéalach, athraíonn siad an forainm mar níl siad sásta liric a chanadh a chuirfeadh in iúl, dar leo, nach daoine díreacha iad.
Is trua é sin, agus is trua níos mó é go gcailltear an deis amhrán taobh amuigh den ghnáthchruth heitrighnéasach a bheith i mbéal an phobail.
Mar sna hamhráin nuachumtha is ait an cás é amhránaí mór le rá a chloisteáil ag canadh amhrán dáiríre faoi chúrsaí grá nó collaíochta agus iad ag trácht ar an inscne chéanna leo féin.
Briseann leithéidí Halsey, Lauren Jaguari agus Frank Ocean an riail sin.
Ach ná séanaimis gur mionlach iad, agus ní hé gur cnaganna móra an tsamhraidh iad a gcuid amhrán ach an oiread.
Cinnte, bhí amhráin cosúil le ‘I Kissed a Girl’ (2008) le Katy Perry, nó ‘Cool For The Summer’ (2015) le Demi Lovato, sna cairteanna ach tá difríocht ann – ní fíoramhráin ghrá iad siúd.
Tá liricí leispeacha á gcanadh acu chun a bheith scanallach.
Nóta spéisiúil faoin dá amhrán sin ná go raibh Max Martin mar chomhscríbhneoir orthu araon.
Fear saibhir é Martin a scríobh an-chuid de na hamhráin is mó ó Baby One More Time Britney Spears ar aghaidh – féach ar a leathanach Wikipedia, whoah.
Tá dearcadh ar leith ag Martin maidir le mná ag pógadh a chéile, is léir.
Seo roinnt liricí Perry: “I’m curious for you / Caught my attention… The taste of her cherry chap stick… It felt so wrong / It felt so right…”
Agus liricí Lovato: “I’m a little curious too, Tell me if it’s wrong… Got a taste for the cherry, I just need to take a bite…”
Rud eile a roineann Perry agus Lovato ná cibé rud faoina gcanann an bheirt, níor dheimhnigh ceachtar acu riamh gur phóg siad bean i ndáiríre.
Ach tá Miley Cyrus againn.
Níl aon amhras ann go bhfuil sí ag cabhrú ó thaobh feiceálacht daoine déghnéasacha le blianta beaga anuas.
Admhaím nach raibh mórán spéise agam i gceol nó i saol Miley Cyrus go dtí 2015 nuair a sheol mo dheirfiúr nasc chugam go dtí an clúdach seo de ‘Don’t Dream it’s Over’, ag iarraidh orm féachaint ar Miley ag radaireacht le hAriana Grande.
Phléasc Twitter an tseachtain seo caite nuair a eisíodh cuid den amhrán is déanaí le Miley, ‘She’s Not Him’.
Deirtear go bhfuil Miley ag scríobh faoi Liam Hemsworth, an t-aisteoir lena bhfuil sí anois geallta, agus Stella Maxwell, an mainicín lena mbíodh sí ag siúl amach.
(Tá Maxwell anois le Kristen Stewart.)
Stella Maxwell agus Miley Cyrus
“There’s no other girl that looks like you, darling / Those eyes, that tongue, those teeth, that face, that body / Even though we’ve gone to outer space / Still no way you can take his place / No matter what you say / No matter what you do / I just can’t fall in love with you / You’re not him / Yeah, she’s not him.”
Beag beann ar cé faoina bhfuil Miley ag canadh, tá sé soiléir go bhfuil sí ag canadh faoina bheith i gcaidreamh le bean, agus í fós i ngrá le fear.
Lena hamhráin is déanaí tá Miley ag taispeáint dúinn go bhfuil sí bródúil as gach cuid di féin, go mbíonn daoine ag athrú, agus sin an saol.
Mar shampla, ar ardán ag na VMAs le déanaí chan Miley ‘Younger Now’, leis na liricí “No one stays the same / You know what goes comes back around / Change is a thing you can count on.”
Táthar ann a cheapann go bhfuil Miley ag filleadh anois ar a bheith díreach.
Níl sí ag gléasadh ‘chomh haisteach’, tá a cuid gruaige á fás aici, tá sí le fear.
Cén chaoi ar féidir cur ina luí ar na daoine sin a chreideann a leithéid nach gciallaíonn sé nach duine déghnéasach í a thuilleadh?
Níl ann ach gur duine déghnéasach í atá anois le fear.
Tá súil agam go leanfaidh Miley léi lena meon oscailte ó thaobh a gnéasachta féin de agus na hamhráin mhacánta atá á scríobh aici ina leith.
