Nach tapa a imíonn an t-am?
Bhuel, braitheann sé ar a ndéanann tú leis...

Sa lá atá inniu ann deirtear go bhfuil saol níos gnóthaí ná ariamh againn. Ón nóiméad a mhúsclaítear maidin Dé Luain, tá gach nóiméad leagtha amach go beacht. Is éasca sleamhnú isteach i bpatrún: éirí, cith, bricfeasta, obair, lón, obair, abhaile, giom, dinnéar, teilifís, leaba, éiri… 

Tagann agus imíonn deireadh seachtaine, an Nollaig, do bhreithlá, an samhradh, agus bliain i ndiaidh bliana braitheann tú go bhfuil an t-am ag imeacht níos sciobtha i gcónaí. 

Más amhlaidh atá, tá dea-scéal agam duit: ní gá go mbeadh sé mar sin!

Tá cúis ann go mbraitheann sé ar nós go bhfuil an t-am ag imeacht níos sciobtha agus muid ag dul in aois. Téann muid i dtaithí ar an domhan mórthimpeall orainn. 

De réir taighde atá déanta ar an inchinn, dá mhéad is atá d’intinn cleachta le taithí ar leith, is ea is lú eolas a bhreacann d’inchinn síos faoin taithí chéanna, agus braitheann tusa go bhfuil an t-am ag bogadh níos sciobtha.

Tá ciall leis gan dabht; is dócha go bhfuil i bhfad níos mó cuimhní agat ó laethanta saoire agus ócáidí speisialta ná do ghnáthlaethanta oibre a bhí sách cosúil lena chéile. 

Mar sin, leis an am a dhéanamh níos moille, ba cheart duit eispéireas nua a aimsiú le d’inchinn a chur ag obair. 

Agus muid inár bpáistí tá gach rud faoin spéir nua, agus mar sin tá an inchinn ag obair i gcónaí chun é ar fad a shú isteach. Ach de réir mar a théann muid in aois, is iomaí duine a thiteann isteach i rithimí leadránacha (mise san áireamh!) agus muid ag freastal ar na bialanna céanna, ag ól sna tithe tábhairne céanna, ag ithe an bhia chéanna i gcónaí. 

Ní gá dul i bhfad ó bhaile le taithí nua a aimsiú leis an am a mhoilliú síos beagáinín. Táim tar éis liosta smaointe a chur le chéile duit, lán de rudaí gur féidir a dhéanamh áit ar bith nach mór! Cad faoi rud éigin a thriail agus do shaol a shíneadh amach beagáinín? 

  1. Blais de mhias nua
  2. Téigh go pub nua
  3. Caith uait an guthán agus tabhair aird ar an domhan mórthimpeall ort
  4. Athraigh do thuras chun na hoibre
  5. Téigh áit éigin i do cheantar nach raibh tú ann riamh
  6. Lig ort gur turasóir thú i do bhaile féin agus freastail ar shiúlóid staire, iarsmalann, srl…
  7. Íoslódáil podchraoladh ar ábhar aisteach
  8. Bain triail as rang nua sa ghiom
  9. Buail le daoine nua a bhfuil dearcthaí difriúla acu
  10. 10.Bí beo sa bhomaite! Tabhair saoirse duit féin cinntí gan choinne a dhéanamh agus gan a bheith i gcónaí ag rith is ag rás ó áit go háit. 

Go n-éirí leat! 

Is féidir Ciara a leanúint ar Twitter anseo