Tá an snámhaí agus an t-eachtraí Gaeltachta Anrí Ó Domhnaill ar shlí na fírinne. Bhásaigh sé go tobann aréir agus é 58 mbliana d’aois. Ba as an Charraig Fhinn i nGaeltacht Thír Chonaill ó dhúchas é Anrí agus bhí sé ina chónaí i nGleann an Chairthe i Leitir Ceannain.
Shnámh Anrí timpeall na hÉireann an bhliain seo caite le hairgead a bhailiú do Chumann Ailse na hÉireann agus Sábháilteacht Uisce na hÉireann, agus d’éirigh leis os cionn €50,000 a bhailiú agus an turas 1,569km á chur de aige. Bhí grá agus paisean aige don snámh agus bhí sé ina ambasadóir le Sábháilteacht Uisce na hÉireann. Ba é an chéad duine a rinne ‘snámh lapaí’ timpeall na hÉireann agus go deimhin timpeall tír ar bith ar domhan. Is éard atá i gceist leis an snámh eite ná lapaí a bheith ar chosa an tsnámhaí agus snorcal a bheith ar a éadan.
Bronnadh an gradam speisialta ‘Freagracht Phobail agus Shóisialta’ ar Anrí i mí na Samhna 2020 as a éacht snámha.
Sléibhteoir cruthanta a bhí in Anrí freisin agus is iomaí turas i sléibhte móra an domhain a rinne sé i gcaitheamh a shaoil – Aconcagua, an sliabh in airde i Meiriceá Theas, ina measc.
Chaith Anrí 12 bliana in Arm na hÉireann agus bhí sé ina fhiannóglach san eagraíocht sin – grúpa saighdiúirí fíorchumasacha. Bhí sé ina bhall d’fhórsaí na Náisiún Aontaithe a bhí sa Liobáin sna 1980idí.
