‘Bua sa Nua-Shéalainn an rud is tábhachtaí an samhradh seo’

D’fhógair Andy Farrell na himreoirí a bheith ag taisteal go dtí an Nua-Shéalainn i rith an tsamhraidh agus is dóigh nach raibh duine in Éirinn a roghnódh an 40 imreoir céanna roimh an bhfógra. 

Ó thaobh na bhfrapaí de, ní raibh ionadh ar aon duine Andrew Porter, Tadhg Furlong, Tom O’Toole, nó Finlay Bealham a fheiceáil. Ní raibh ionadh orm ainm Cian Healy a fheiceáil ach an oiread, ach mar a scríobh mé cheana féin, tá Éire ró-spleách ar fhrapa Laighean. Ag an am céanna, níor roghnaíodh Andrew Warwick, fear a d’imir cluiche i ndiaidh cluiche d’Ulaidh i gcluichí móra i mbliana ach ainmníodh Jeremy Loughman, imreoir nach raibh in ann áit le foireann na Mumhan a choinneáil. 

Bhí rogha an húcálaí i bhfad níos simplí. Is é Ronan Kelleher príomhrogha Farrell, ach cé go bhfuil sé gortaithe osclaíonn sé sin an doras do Dan Sheehan. Is léir go dtosóidh Sheehan an chéad mhórchluiche anois. Bhí Rob Herring i gcónaí chun taisteal ach, mar gheall ar ghortú Kelleher, is é Dave Heffernan an chéad húcálaí eile a thiocfaidh isteach. 

Roghnaigh Farrell Joe McCarthy sa dara líne agus tá sé iontach Cian Prendergast a fheiceáil ainmnithe sa líne chúil tar éis séasúr dochreidte do Chonnachta. Bhíodh sé ag traenáil le hAcadamh Laighean ach dúradh leis nach raibh áit dó leo ag deireadh an shéasúir. Chuir Andy Friend glaoigh air agus thart ar dhá bhliain níos déanaí beidh sé ar eitleán ag dul go dtí an Nua-Shéalainn. 

Ainmníodh Conor Murray, Jamison Gibson-Park, agus Craig Casey mar leathchúlaithe clibirte. Is dóigh go raibh mí-ádh ar Casey nár thosaigh sé i níos mó cluichí don Mhumhain i rith na bliana (roghnaíodh é i bhfoireann URC na bliana fiú) agus is é tuairim lucht leanúna na Mumhan nach raibh Murray ag imirt thar mholadh beirte sa dara leath den séasúr. Is é sin an fáth céanna a bhfuil daoine ag argóint faoi eisiamh Cooney nó Doak, ach teastóidh taithí Murray sna mórchluichí.

Ní thuigim cén chaoi ar ainmníodh Harry Byrne. Níor thosaigh sé ag ceithre chluichí do Laighin i rith an shéasúir. Ach beidh seisean, Johnny Sexton, agus Joey Carbery mar leathchúlaithe clibirte amuigh don turas. B’fhéidir go ndéarfaí go bhfuil taithí aige ar stíl ionsaithe Laighean (mar go n-imríonn siad an stíl chéanna ionsaithe atá ag Éirinn) ach níl ciall leis sin ach an oiread mar is é Ross Byrne a d’imir cluichí móra Laighean.

Tá Rob Baloucoune agus Andrew Conway gortaithe. Bhí díomá ar Andy Farrell agus é ag caint faoi Baloucoune. Bhí sé ceaptha a bheith ag taisteal go dtí gur gortaíodh sa bhabhta leathcheannais in aghaidh na Stormers é ag an deireadh seachtaine (tá Conway gortaithe le fada anois). Mar gheall air sin, tagann Jordan Larmour agus Jimmy O’Brien isteach.

Is é bua sa Nua-Shéalainn an sprioc is tábhachtaí faoi láthair. Déarfar gurb é Corn an Domhain an rud is tábhachtaí, agus tá an ceart ag an té a déarfaidh, ach ní hé an rud is tábhachtaí i mbliana.

Tá an fhoireann seo ag dul chuig an taobh eile den domhan chun bua a fháil, rud nach ndearna aon fhoireann shinsir fear roimhe seo. Tá deis acu rud éigin stairiúil a chruthú, b’fhéidir an deis dheireanach má tá ráiteas Farrell ceart. Is imreoirí gairmiúla iad seo; ní bheidh siad ag iarraidh dul chun turgnamh foirne de shaghas éigin a dhéanamh chun doimhneacht na foirne a scrúdú.

Is é an bua (nó bua amháin as na trí chluiche ar a laghad) sa Nua-Shéalainn an rud is tábhachtaí an samhradh seo.