Cá bhfuil na himreoirí óga?

Cúpla bliain ó shin, bhíodh cluichí idir-chúige ar siúl ar Lá an Dreoilín. D’imrítí an cluiche idir Mumha agus Laighin thíos i Luimneach de gnáth. Cé gur ócáid den scoth a bhí ann, le daoine a bhí fós lán tar éis dinnéar Lá Fhéile Stiofáin agus is dóigh roinnt piontaí ólta acu roimh an gcluiche, bhí mionlach ann i gcónaí ag tabhairt amach nach raibh imreoirí sinsearacha na gcúigí ar fáil. De gnáth, ba iad na himreoirí óga a roghnaigh na foirne bainistíochta mar bhí orthu sos a tabhairt do na himreoirí eile.

Anois, áfach, nuair a thagann imreoirí sinsearacha amach ar an bpáirc, bíonn daoine ag gearán nach bhfuil na himreoirí óga ag fáil deiseanna; gur cheart dóibh a bheith ar an bpáirc. Is fáinne fí é. Tá imreoirí maithe óga ag fáil taithí diaidh ar ndiaidh ach tá roinnt daoine ann a cheistíonn cén fáth nach n-imríonn siad i ngach aon chluiche.

Tá roinnt cúiseanna leis sin, agus is ceann an-simplí an chéad cheann: teastaíonn an bua ón mbainisteoir. Is spórt gairmiúil é. Is imreoirí gairmiúla iad. Caithfidh an fhoireann airgead a ghnóthú agus is é an bua an chaoi chun é sin a dhéanamh. Chomh maith leis sin, mar a luaigh mé, is imreoirí gairmiúla iad na himreoirí. Má chailleann siad cluichí, nuair atá conradh nua uathu ag deireadh séasúir, ní bheidh ceann ann dóibh le síniú, agus tá bainisteoir na foirne san áit cheannann céanna. Ba mhaith liom féin imreoirí óga a fheiceáil i gcluichí, ach is é an bua bun is barr gach aon rud i spórt gairmiúil.

An dara rud ná ní féidir le roinnt imreoirí óga cluiche i ndiaidh chluiche a imirt mar níl siad iomlán réidh don fhisiciúlacht leanúnach a thagann le rugbaí ag an leibhéal sin. Tógann sé tamall dul i dtaithí air. Smaoinigh faoi Eben Etzebeth: samhlaigh imreoir óg ag déanamh greamú air arís agus arís eile ar feadh cluiche iomlán. Ceapann roinnt daoine gur cluiche ríomhaire é, go mbeidh an t-imreoir ceart go leor díreach tar éis an chluiche. Ach ní bheidh. Teastaíonn sos uathu. 

Tóg Gavin Coombes mar shampla, imreoir lárnach do Mhumhain. Is fear mór, láidir é, fear a bhíonn thar a bheith fisiciúil agus é i mbun imeartha. Ach níor imir sé ach 246 nóiméad ina chéad séasúr do Mhumhain. An bhliain ina dhiaidh sin, d’imir sé níos lú: 140 nóiméad. Ach an bhliain ina dhiaidh sin arís, d’imir sé 1,308 nóiméad agus thosaigh sé i 17 gcluiche as 22 chluiche. Cinnte, bhí fear darbh ainm CJ Stander ag imirt agus ag tosú do Mhumhain den chéad dhá bhliain d’am Coombes, ach fós, is méadú ollmhór é.

Bíonn eisceachtaí ann, cinnte. Daoine ar nós Joe McCarthy. Ach, formhór an ama, teastaíonn am ó imreoirí óga. Tá an spórt ag éirí níos fisiciúla le gach aon séasúr a théann tharainn. Má chaitear imreoirí óga isteach nuair nach bhfuil siad réidh, ní bheidh imreoirí ann le cluichí a imirt sa todhchaí.