Craolfar cluichí na hÉireann i gcomórtais EuroBasket na mBan agus EuroBasket na bhFear ar TG4 an mhí seo. Beidh cluiche cáilithe na mban in aghaidh na Seicia ar an teilifís Dé Domhnaigh an 14 Samhain agus beidh cluiche réamh-cháilithe na bhfear in aghaidh na hOstaire á chraoladh coicís ina dhiaidh sin ar an 28 Samhain.
Is é seo an chéad uair ó bhí 2009 a bheidh foirne cispheile na hÉireann san iomaíocht sa tsraith is sinsearaí i gcomórtas cispheile na hEorpa. Beidh an dá chluiche á n-imirt sa Láthair Náisiúnta Chispheile i dTamhlacht ag 17.00 agus tosófar an craoladh ar TG4 ag 16.50.
Is í Máire Treasa Ní Cheallaigh an tí seo a chuirfidh an craoladh i láthair in éineacht le foireann anailísithe a bhfuil saineolas acu ar an spórt.
“Tá sé ar fheabhas ar fad don spórt go gcraolfar ár gcluiche baile i mí na Samhna beo ar TG4. Tugann sé spreagadh mór don scuad chomh maith, a bhí ag obair chomh dian sin le go mbeadh an chuma is fearr agus is féidir orthu agus iad ag tosú amach lena bhfeachtas cáilithe do EuroBasket na mBan 2023 de chuid FIBA. Táimid ag iarraidh go spreagfaidh cailíní na foirne seo an chéad ghlúin eile agus beidh sé ina chuidiú dóibh a bheith ar theilifís bheo chun é sin a bhaint amach,” a dúirt James Weldon, príomhchóitseálaí fhoireann sinisir na mban.
Tá foireann sinsir ban na hÉireann i nGrúpa I do chluichí cáilithe EuroBasket na mBan 2023, in éineacht le foirne na Bealarúise, na Seicia agus na hÍsiltíre. Beidh an chéad chluiche cáilithe as baile, i gcoinne na hÍsiltíre, ar siúl Déardaoin an 11 Samhain, agus an chéad chluiche baile ag tarlú trí lá ina dhiaidh sin ar an 14 Samhain, in aghaidh Seicia.
Tá foireann sinsir fear na hÉireann i nGrúpa A de Chéad Bhabhta Réamh-Cháilithe EuroBasket 2025, in éineacht leis an Eilvéis, an Ostair agus an Chipir. Beidh an chéad chluiche ar siúl as baile i gcoinne na Cipire Déardaoin an 25 Samhain, agus beidh an chéad chluiche baile ar siúl ina dhiaidh sin Dé Domhnaigh an 28 Samhain, i gcoinne na hOstaire. Tá trí ghrúpa i gCéad Bhabhta Réamh-Cháilithe EuroBasket 2025, agus rachaidh ceithre fhoireann ar aghaidh chuig an dara babhta.
