‘Cosnaímis agus spreagaimis ár lúthchleasaithe nua óga’

Is fada ón lá ó bhí deis againn tacú le lúthchleasaithe óga, cé is moite de chorrdhuine anseo is ansiúd. Mar gheall ar ghortaithe agus ar chúinsí éagsúla eile, níl an oiread sin súp bainte againn as Thomas Barr agus a cheap muid a bheadh againn. 

Tá sé ós cionn scór blianta ó bhíodh muid ar fad ag suí síos ós comhair na teilifíse ag faire ar ár réalta, Sonia O’Sullivan. Thug sí údar cheiliúrtha dúinn, agus bhí a fhios againn go raibh seans maith ann go mbeadh sí ar an gcéad thriúr thar an líne. Eiseamláir iontach a bhí inti chomh maith do ghasúir, idir buachaillí agus cailíní. Thaispeáin sí cruas, macántacht, láidreacht, agus nuair a thit sí, sheas sí suas arís agus choinnigh sí uirthi. 

Ó shin, cé go raibh reathaithe eile againn, ní raibh greim ag aon lúthchleasaí eile ar ár gcroíthe, mar a bhí déanta ag Sonia, is dóigh mar go raibh sí chomh feiceálach agus í chomh hionraic ina cuid cainte.

Faoi dheireadh, tá glúin nua tagtha chun cinn. Le coicís, tháinig sé bhonn ar ais go hÉirinn ó dhá chomórtas idirnáisiúnta faoi aois do mhná óga. Tá an caighdeán an-ard ag na rástaí seo, agus má leanann na lúthchleasaithe óga seo orthu, déanfaidh siad chomh maith agus níos fearr ná Derval O’Rourke, a dúirt nár facthas riamh an méid sin lúthchleasaithe ag teacht chun cinn ag an am céanna in Éirinn. 

I measc na mban a fuair boinn, bhí Sophie O’Sullivan a fuair bonn airgid sa rás 800m (ar ndóigh cá bhfágfadh sí é), agus Rhasidat Adeleke, a fuair bonn óir sa rás 200m. Faraor, tá roinnt nach bhfuil in ann é seo a cheiliúradh, mar go bhfuil cuid de na mná óga seo a rinne chomh maith sin agus veist ghlas ar a ndroim, dubh. 

Is dóigh nach bhfuil a gcuid fola chomh glas agus chomh gaelach leis an bhfuil atá ionamsa. Ní fíor-Ghaeil iad, a dúradh, mar níor rugadh anseo iad. San Astráil a rugadh Sophie O’Sullivan, ach is cosúil go bhfuil sé sin ceart go leor, de réir lucht an chiníochais. Tá a gcuid ainmneacha ró-aisteach, a dúradh, cé nach bhfuil mórán Éireannach atá in ann m’ainm féin a rá gan sciorradh nó ceist a chur orm ag iarraidh a fháil amach cén Béarla atá air. Ach tá mise bán. Níl ionamsa ach sceimhlitheoir cultúrtha ag dul thart le mo chuid Gaeilge, agus mo chosa caola bána.

Ní inniu ná inné a chonaic muid é seo. Is iomaí drochrud a dúradh le Jason Sherlock Bhaile Átha Cliath mar nár bhreathnaigh sé cosúil leis an gcuid eile againn. Tá drochíde faighte ag Lee Chin Loch Garman chomh maith. 

Rugadh Gina Akpe-Moses sa Nigéir, ach tá sí ina cónaí i nDún Dealgan ó bhí sí trí bliana d’aois. Mar a dúirt sí féin, is Éireannach í agus níl sí nua, ach tá sí difriúil. Tá glúin nua lúthchleasaithe againn anois. Ba cheart iad a cheiliúradh, mar a rinne muid le Sonia agus Derval. Is dial trua an té nach bhfuil in ann an méid sin a fheiceáil. Tá sé de dhualgas orainn aon torann a dhéanann siad a cheansú, agus na daoine óga seo atá sásta ionadaíocht a dhéanamh orainn a chosaint agus a spreagadh.