Bhain foireann na bhFear+ leis na Gaeil Aeracha a gcéad trófaí sraithe Dé Luain an 23 Meitheamh i ndiaidh comhscór (2-11; 1-14) in éadan Chaisleán Cnucha. Bronnadh Corn Go Ahead Ireland AFL (Rannóg Peile na nDaoine Fásta) Roinn 11A ar Ciarán Murphy agus Neil Murphy, comhchaptaein na foirne, thar ceann Bhord Chontae Bhaile Átha Cliath. Is iad an chéad fhoireann LADTA+ sa spórt iad le sraith CLG a bhuachan.
“Is toradh de bhlianta fada d’obair chrua mar fhoireann an méid atá bainte amach againn an séasúr seo. Bunaíodh Na Gaeil Aeracha le sprioc shimplí chun spás sábháilte a chruthú do dhaoine aeracha laistigh den CLG agus a thaispeáint do gach duine gur dúinn uile atá an spórt. Ní neart go cur le chéile,” arsa Ciarán Murphy, Captaen Peile na bhFear+ leis Na Gaeil Aeracha.
Chuir an fhoireann tús lena sraith bhuacach i mí Feabhra le pointe amháin cinntitheach i gcoinne Ranelagh Gaels. Bhuaigh siad in éadan Clanna Gael Fontenoy, Caban tSíle agus Ballyfermot Gaels i measc foirne eile agus sa deireadh, bhain siad 10 gcluiche as a chéile.
“Ciallaíonn an bua seo níos mó ná teideal amháin — is ráiteas é. Léirigh ár bhfoireann gur féidir le daoine éachtaí iontacha a bhaint amach nuair a thugtar spás dóibh le bheith ar a nós féin. Táim thar a bheith bródúil as gach imreoir, ní hamháin as a gcumas, ach as a misneach, a seasmhacht agus a n-aontacht. Is do gach duine a mhothaigh riamh nach raibh spás ann dóibh sa spórt an bua seo — tá spás ann daoibh, agus beidh i gcónaí,” a dúirt Richard Forde, Bainisteoir Peile na bhFear+.
“Bhí roinnt laethanta iontacha agam mar imreoir le mo chlub baile, ach tá an toradh agus an t-éacht seo leis Na Gaeil Aeracha níos fearr ná aon rud a raibh baint agam leis riamh sa CLG. Is spreagúil an méid atá bainte amach ag an ngrúpa imreoirí seo i dtréimhse chomh gearr sin. Is iad laethanta mar seo an fáth go bhfuil CLG chomh speisialta sin,” arsa Alex Griffith, Príomhchóitseálaí Peile na bhFear+
Tá Na Gaeil Aeracha ag déanamh ceiliúradh ar chúig bliana den chumann i mbliana. Bunaíodh an cumann in 2020 chun spás a thabhairt d’imreoirí LADTA+ a bheith ar a nós féin sa spórt saor ón bhreithiúnas. Tá ceithre fhoireann ag Na Gaeil Aeracha sa Pheil Ghaelach, san Iománaíocht, sa Chamógaíocht agus i bPeil na mBan.
