Tá an tríú séasúr tosaithe ag an URC (Craobh Aontaithe an Rugbaí ina nglacann clubanna as Éirinn, Albain, an Bhreatain Bheag, an Iodáil agus an Afraic Theas páirt) agus, ceithre bhabhta isteach sa chomórtas, tá ionchais an lucht leanúna ard.
Is í an ghné is iontaí den tsraith go dtí seo ná gur foireann Iodálach í atá fós gan sárú. Mar gheall ar nádúr intuartha roinnt de na sraitheanna roimhe seo, sular bunaíodh an URC, ní tharlódh sé seo san am atá thart. Ach ó tharla go bhfuil Corn Rugbaí an Domhain díreach críochnaithe agus go bhfuil an comórtas níos déine ná riamh, tá an séasúr an-oscailte, rud atá ina spreagadh iontach.
Is é an rud is mó a léiríonn leibhéal na hiomaíochta go dtí seo i mbliana ná go bhfuil cluiche fós le cailleadh ag Benetton agus níl siad ach sa chúigiú háit. Léiriú eile ar an leibhéal iomaíochta is ea Zebre sa 11ú háit agus iad chun tosaigh ar chúig fhoireann eile, rud nach gcloistear go hiondúil (nó nár chualathas riamh). Den chéad uair i stair an URC, bhuaigh Zebre agus Benetton ar an deireadh seachtaine céanna. Níl ach cúig phointe idir an fhoireann sa chéad áit agus an fhoireann sa 10ú háit. Má theastaíonn comórtais iomaíocha ó thús agus i rith na sraithe ina hiomláine ón lucht leanúna, sásóidh an URC an mhian sin.
Faraor, níl gach foireann ag an leibhéal sin iomaíochta. Níor éirigh leis na ceithre fhoireann ón mBreatain Bheag ach ceithre chluiche as 16 a bhuachan, agus ceann amháin de na foirne sin, níl aon bhua faighte acu in aon chor. Déanta na fírinne, chaill ceithre fhoireann na Breataine Bige an deireadh seachtaine seo caite agus an t-aon chúis a gcreidim go mbeidh an bua ag ceann d’fhoirne Cymru an deireadh seachtaine seo ná go mbeidh dhá fhoireann ón mBreatain Bheag ag imirt in aghaidh a chéile.
Tá ceithre cinn de na seacht n-áit is fearr sa sraithchomórtas ag cúigí na hÉireann. An t-iontas is mó a bhí ann ná gur chaill Cúige Laighean sa chéad chluiche den séasúr, ach tá cluichí mar sin go maith do shláinte agus d’iomaíochas na sraithe.
Ó thaobh na gcúigí de, is é an cluiche is bisiúla den deireadh seachtaine ná Cúige Mumhan i gcoinne Stormers na hAfraice Theas, dhá fhoireann a d’imir sa chluiche ceannais anuraidh. Beidh an dá fhoireann ag iarraidh a thaispeáint go bhfuil feabhas tagtha orthu ó shin agus beidh na Stormers ag iarraidh an lámh in uachtar a fháil i Luimneach. Leis an iomaíochas atá feicthe againn go dtí seo, áfach, ní cinnteacht é bua na Mumhan.
Ach ar an iomlán, ós rud é nach bhfuilimid ach sa tríú bliain den chomórtas seo, ní chreidim go bhféadfadh na daoine atá i gceannas a bheith níos sásta leis an táirge atá cruthaithe acu. Tá an tsraith ag dul ó neart go neart, agus Príomhroinn Shasana ag streachailt níos mó agus níos mó gach aon mhí ag an am céanna. Tá a luach féin á chruthú ag an URC lena iomaíochas agus lena spleodracht den scoth.
