Is í Aoife Ní Chiobháin as Corca Dhuibhne ‘an Duine is Aclaí sa Ghaeltacht’ tar éis di an míleáiste is mó a chur isteach i gComórtas Reatha na Gaeltachta – 749km. Fógraíodh buaiteoirí uile an chomórtais ar an gclár Iris Aniar ar RTÉ Raidió na Gaeltachta ar maidin. Sa dara háit bhí Gráinne Ní Dhomhnaill as an gCeathrú Rua a chuir 628km isteach i gcaitheamh an chomórtais, agus a comrádaí as an ngrúpa céanna Anna Leainde a tháinig sa tríú háit.
Soir go contae na Mí a bheidh Corn Raidió na Gaeltachta don fhoireann is fearr ag dul agus an gradam sin buaite ag ‘Mí-Aclaí’, grúpa a raibh meánmhíleáiste 59km acu i gcaitheamh na gceithre seachtaine. Bhí iomaíocht ghéar ann leis na ‘Múscrateer’ agus ‘Reathaithe Rua’ na Ceathrún Rua ach d’éirigh le muintir na Mí an ceann is fearr a fháil ar an dá fhoireann eile sa tseachtain dheireanach den chomórtas.
Foireann Inis Meáin, ‘Fanaicigh Folláin Inis Meáin’, a tháinig sa chéad áit sa rannóg d’fhoirne beaga (níos lú ná 45 duine) agus meánmhíleáiste 57.9km acu. ‘Gradam Údarás na Gaeltachta’ a bhronnfar orthu sin, gradam a bhuaigh siad i gcomórtas na bliana seo caite freisin. Muintir Árainn Mhóir i nDún na nGall a tháinig sa dara háit, agus ‘Na Sodairí ar Sodar’ as Ceantar na nOileán i nGaillimh a tháinig sa tríú háit.
Ghlac 660 duine as 14 cheantar Gaeltachta páirt i gComórtas Reatha na Gaeltachta i mbliana agus ar an iomlán ritheadh agus siúladh 117,000km i gcaitheamh na gceithre seachtaine.
Taobh amuigh den chomórtas oifigiúil, tá cuid de na grúpaí Gaeltachta ag eagrú a ngradam féin do rannpháirtithe áitiúla an chomórtais: beidh duaiseanna ag pobal Iardheisceart Dhún na nGall don teaghlach is aclaí, don duine is greannmhaire, don duine is spreagúla agus do dhaoine eile freisin.
Dúirt Majella Ní Chríocháin, Oifigeach Pleanála Teanga na Ceathrún Rua, go ndearna muintir na Gaeltachta “sár-iarracht” ar son gceantair agus gur cothaíodh caidreamh agus cumarsáid i nGaeilge i measc na bpobal éagsúil le linn an chomórtais.
“Ní dírithe ar chúrsaí aclaíochta amháin a bhí an comórtas áfach, ach ag iarraidh caidreamh agus cumarsáid trí Ghaeilge a chothú i measc na bpobal éagsúla. Agus is cinnte go bhfuil an sprioc sin bainte amach
againn. Bhí go leor spraoi sna grúpaí whatsapp, daoine ag spreagadh agus ag moladh a chéile, agus ag magadh faoina chéile freisin ar ndóigh!” a dúirt sí.
Dúirt Majella go “ardú meanman” do phobal na Gaeltachta a bhíonn sa chomórtas, go “neartóidh sé spiorad an phobail” agus gur “treisíodh féiniúlacht Ghaelach na bpobal” tríd an gcomórtas.
Tá torthaí iomlána Chomórtas Reatha na Gaeltachta anseo:
