Faoin am a bheidh tú á léamh seo beidh cúpla alt léite agat cheana féin, agus neart comhráití cloiste agat faoin bplean a bhí ag Cumann Lúthchleas Gael athstruchtúrú a dhéanamh ar an gcraobhchomórtas. Chlis ar an rún mar ní raibh dóthain tacaíochta acu, ar chúis amháin nó ar chúis eile. Táthar ann a bheidh den tuairim go bhfuil rudaí fágtha ina steig meig ach i ndáiríre, ní raibh an t-athstruchtúrú seo le mórán feabhais a chur ar shaol an imreora.
Bhí sé níos fearr ná mar atá rudaí faoi láthair, ach ní mórán de dhuais é sin ach oiread. Aontaíonn chuile dhuine go dteastaíonn athrú, ach feictear dom féin nach bhfuil muid ag breathnú ar an rud ceart. Bíonn daoine ag sárú cén fáth nach féidir lucht na hiomána a leanúint, ach tá siadsan breá sásta sraitheanna a imirt do choirn éagsúla, ach tá na foirne peile ar fad ag iarraidh an deis chun imirt do Chorn Sam Mhig Uidhir, cé nach bhfuil seans na grást ag an gcuid is mó acu.
Idir an dá linn, tá imreoirí ag tréigeadh CLG. Ag dul go dtí spóirt eile. Áit ina mbeidh cluichí acu. Píosa craic. Seachas traenáil, traenáil, traenáil agus íde béil. Tá cultúr sa CLG atá bunaithe ar an bhfulaingt. Mura bhfuil fir óga ag fulaingt nó ag seachaint na craice, níl siad á dhéanamh i gceart. Ordaítear gan aon deoir a ól ar feadh cúpla mí, agus ansin bíonn iontas ar dhaoine nuair nach bhfuil aon chaidreamh aibí ag go leor leis an alcól. Seo club agus contae.
Chuile bhliain caitheann imreoirí in aer an pheil agus níl aon duine ag ceistiú cén fáth, go dtí go roghnaíonn fear mar Jack McCaffrey a dhéanamh agus bíonn iontas orainn cén fáth a mbeadh duine mar é ag éirí as? Agus deis aige cúpla bonn eile a thabhairt leis? Dúirt sé amach go lom é. Ní raibh aon spraoi ann. Cé go raibh sé ar an bhfoireann ab fhearr agus rathúla sa tír. Níor úirt aon duine gur léiriú é seo ar an gcultúr, níl aon imní mhór ann, is cosúil, ar na toscairí ar fad faoi cén fáth a mbeadh fear óg mar é, agus fir óga eile nach bhfuil chomh cáiliúil céanna leis á chaitheamh in aer.
Le blianta beaga tá agallaimh déanta ag dóthain imreoirí agus iar-imreoirí ag cur síos ar an obair a bhí orthu a dhéanamh, an bhail a d’fhág sé ar a gcorp agus ar a meabhairshláinte. Níl tada ag athrú. Coinnigh ag obair iad go dtí go gcliseann siad, agus ansin faigh grúpa nua.
Seo an fhadb atá ag an CLG. Ní struchtúir agus airgead. Easpa spraoi. Bhí uair ann a bhí fir óga sásta cur suas leis. Níl imreoirí óga na linne seo chomh héasca céanna ag bainisteoirí. Tá oideachas orthu. Tá fios acu nach bhfuil san óige ach seal. Cheana féin, tá sé ráite ag bainisteoirí ar fud na tíre go bhfuil na himreoirí is fearr sa gcontae ag fanacht amach uathu. Ní leigheasfaidh aon struchtúr nua é sin, mura bhfuil sé i gceist acu eispéireas na n-imreoirí a fheabhsú chomh maith. Agus níl tada na ngrást á rá faoi sin.
