Níl ach cluiche amháin fágtha ag foireann Éireann na mBan chun taispeáint nach bhfuil cúlchéimniú iomlán déanta acu ón gcomórtas anuraidh. Chonaiceamar dhá bhua anuraidh, ceann in aghaidh na hIodáile agus ceann in aghaidh na hAlban. Faraor, níl cluiche buaite ag Éirinn i mbliana go fóill agus níl mórán feicthe againn go dtí seo a léiríonn go n-athróidh sé sin.
Scóráil imreoirí na hÉireann 68 bpointe anuraidh sa chomórtas iomlán, scóráladh deich n-úd i gcúig chluiche agus thug siad an lá leo i ndá chluiche. I mbliana, faraor, scéal iomlán difriúil atá ann. Níl ach 15 phointe scóráilte acu i gceithre chluiche: úd in aghaidh na Breataine Bige, cic éirice slánaithe in aghaidh na Fraince, agus úd éirice bronnta in aghaidh na hIodáile. Mar bharr ar an donas, níl splanc ar bith le feiceáil in ionsaí na hÉireann. Níl ach seacht mbriseadh líne feicthe againn go dtí seo, gan mórán bearnaí cruthaithe ach an oiread. Tá níos lú méadar déanta ag Éirinn (2,441.5) ná aon fhoireann eile. Tá níos lú greamaithe briste ag Éirinn ná aon fhoireann eile.
Anuraidh, ghéill Éire 158 bpointe (24 úd san iomlán). Tá 156 phointe géillte acu cheana féin i mbliana freisin le cluiche fós le n-imirt (tá 25 úd géillte acu freisin, toradh níos measa ná anuraidh fiú agus cluiche amháin le n-imirt). Tá 151 ghreamú caillte ag an bhfoireann, an toradh is measa sa chomórtas. Tá níos lú greamuithe dearfacha ag Éirinn ná aon fhoireann eile. Is léir go bhfuil foireann na hÉireann ag streachailt. Tá imreoirí an-mhaith acu; teastaíonn an struchtúr agus an tacaíocht cheart uathu.
Tá an cluiche le teacht in aghaidh na hAlban thar a bheith tábhachtach. Mar a luaigh mé, tá sé tábhachtach a thaispeáint nach bhfuil cúlchéimniú iomlán déanta (cé go léiríonn na híomhánna den ionsaí agus cosaint é sin cheana féin). Tá an cluiche seo thar a bheith tábhachtach ar chúis éigin eile freisin agus muid ag druidim i dtreo an chomórtais WXV. Má chailleann Éire, rachaidh siad isteach sa tríú sraith. Chun fáil isteach sa dara sraith, beidh orthu dhá rud a dhéanamh. Tá orthu an cluiche a bhuachan le níos mó ná 31 phointe, gan pointe ar bith a thabhairt d’Albain. Dúshlán ollmhór atá ann; b’fhéidir rómhór. Fiú má n-éiríonn leo, bheadh orthu cluiche a imirt in aghaidh na Spáinne ansin, agus buaiteoir an chluiche sin ag dul isteach sa dara sraith agus an caillteoir ag dul isteach sa tríú sraith. Ní bheidh aon fhoireann ag dul suas ná síos ar feadh dhá bhliain, agus ciallaíonn sé sin go bhfuil an cluiche seo níos tábhachtaí arís.
Ó tháinig an fhoireann bainistíochta seo isteach, tá beagnach dhá Chraobh Sé Náisiúin imeartha chomh maith le turas go dtí an tSeapáin. Tá sé ráite arís agus arís eile acu go bhfuil siad ag tógáil foirne, ach ní dóigh liom go bhfuil beart á dhéanamh de réir a mbriathair ag an bhfoireann bainistíochta. Más é seo an chéad chéim i dtreo todhchaí níos fearr, céard a bhí i gceist leis an gcomórtas agus an turas anuraidh? Tá an Bhreatain Bheag tar éis forbairt iontach a dhéanamh le dhá bhliain anuas agus tá dóchas ann go mbeidh Éire in ann an rud céanna a dhéanamh, ach tá fáil ag formhór imreoirí na Breataine Bige ar rugbaí sa Premiership 15s, comórtas i bhfad níos fearr ná aon rud atá againn anseo sa bhaile.
Ní fhacamar cúis dóchais go dtí seo sa chomórtas i mbliana; tá súil agam go bhfeicfidh muid é ar an Satharn ach tá seans ann go bhfuil sé ródhéanach anois.
