“Win the game – sin é” na focail a d’úsáid captaen fhoireann rugbaí na hÉireann, Brian O’Driscoll, roimh chluiche cinniúnach na Sé Náisiún leis an mBreatain Bheag i gCaerdydd Dé Sathairn.
Agus sin an rud a rinne siad.
Ní raibh dul amú ar O’Driscoll ach an oiread nuair a ghlaoigh sé “sweet, sweet day” ar 21 Márta 2009 mar, i ndiaidh 61 bliain, bhí an Grand Slam buaite ag foireann Éireannach arís.
Scóráil captaen na foirne agus Tommy Bowe úid na hÉireann agus chinntigh cic ó Ronan O’Gara an bua.
Ba lá é le curiarrachtaí nua a chlárú, ní hamháin gur bhuaigh Éire an Triple Crown, an RBS Six Nations, agus an Grand Slam, ach chuir O’Gara le líon na bpointí atá faighte aige le bheith mar an scórálaí is fearr riamh sa chomórtas le 499 pointe, agus chuir laoch na himeartha, O’Driscoll, le líon na n-úd atá faighte aige féin, é ag scóráil a 21ú ceann sna Sé Náisiúin.
Tar éis thubaiste an Choirn Domhanda agus blianta gan sciath nó corn sna Sé Náisiúin, is é seo a bhí le rá ag Brian O’Driscoll i ndiaidh an chluiche, “It’s a fantastic feeling and just reward for the hard work we’ve put in through a lot of years. We’ve had good times and not so good times, but this is a great time.”
Is dócha go bhfuil an tír uilig ar aon tuairim gur “great time” é seo, in ainneoin an ghéarchora chreidmheasa.
Ba bheag ceiliúradh a bhí á dhéanamh áfach ag lucht tacaíochta na hÉireann agus foireann na Breataine Bige sé phointe chun cinn ag leath ama, a bhuí le dhá chic pionóis buailte thar an trasnán ag Stephen Jones.
Ach díreach i ndiaidh an tsosa léirigh na hÉireannaigh cén fáth a raibh na coirn uilig tuilte acu.
Scóráil O’Driscoll sa 43ú nóiméad agus trí nóiméad níos déanaí fuair Bowe a úd iontach.
Sa 50ú nóiméad d’aimsigh Jones cic pionóis eile don Bhreatain Beag ach bhí gach duine in ann an brú a bhí air a aithint agus ba bheag nár chuir sé an cic ar fóraoil.
Níor chaill na himreoirí i nglas a bhfócas i ndiaidh do Cymru dul chun cinn agus níorbh fhada gur chruthaigh siad deis do O’Gara preabchúl iontach a scóráil chun Éire a chur chun tosaigh arís, 17 i gcoinne 15.
Ar dheireadh bhí an t-ádh le foireann Declan Kidney nuair a chuir Jones an cic deireanach den chluiche ar fóraoil agus é 48 méadar ón chúl.
Bíonn ádh ag teastáil ó gach foireann, agus deirtear go gcruthaíonn na foirne is fearr a gcuid áidh féin.
Chaithfeá rá go raibh an bua agus an t-ádh tuilte ag an bhfoireann laochúil seo. Léirigh siad dúinn uilig cad is féidir a dhéanamh nuair atá muinín agus dóchas agat, mar aon le hobair an-chrua.
I ndiaidh seacht seachtaine rugbaí agus cúig bhua, 121 pointe, dhá churiarracht nua, Grand Slam, Triple Crown, agus Corn na 6 Náisiún, tá ardú meanman faighte ag an tír uilig agus toradh cuí ar a gcuid oibre faighte ag pobal rugbaí na hÉireann.
Ár mbuíochas libh as ucht an éachta seo!
