Smaoineamh maith é turas ‘Emerging Ireland’ i bprionsabal ach tá an iomarca míbhuntáistí i gceist

Tabharfaidh Simon Easterby foireann ‘Emerging Ireland’ ar thuras chuig an Afraic Theas i Meán Fómhair chun trí chluiche a imirt in aghaidh na Griquas, Pumas, agus Cheetahs. Roghnófar níos mó ná 30 imreoir chun dul ar an turas, turas a chiallaíonn nach mbeidh na himreoirí seo ar fáil do na cúigí do roinnt babhtaí den séasúr nua URC. 

Dúradh go bhfuil Easterby chun díriú isteach ar na himreoirí a d’imir sna cluichí in aghaidh na Maorach All Blacks i rith an tsamhraidh agus imreoirí eile nach raibh deis acu imirt ar an turas sin chun doimhneacht a chruthú don Chorn Domhanda Rugbaí agus seans a thabhairt d’imreoirí imirt faoi threorú na bainistíochta. 

Is smaoineamh maith é i bprionsabal, ach tá an iomarca míbhuntáistí ag baint leis.

Féach ar na foirne atá i gceist don trí chluiche: trí fhoireann nach bhfuil maith go leor chun imirt sa URC, foirne nach mbeidh imreoirí idirnáisiúnta acu. Dá bhfanfaidís (imreoirí na hÉireann) sa bhaile, bheadh siad ag imirt in aghaidh foirne atá níos fearr (den chuid is mó). Bheadh imreoirí na Mumhan ag imirt in aghaidh Dragons, Zebre, agus Chonnacht (b’fhéidir nach bhfuil mórán difríochta ann dóibh siúd a roghnófaí don chéad dhá chluiche sin ach bheadh Connachta i bhfad níos fearr mar chéilithe comhraic ná na foirne a luaigh mé sa chéad alt). 

Tá Ulaidh le n-imirt in aghaidh Scarlets, Laighin, agus Ospreys. Tá Laighin le n-imirt in aghaidh Benetton, Uladh, agus Sharks, agus tá Connachta le n-imirt in aghaidh Stormers, Bulls, agus na Mumhan. Den chuid is mó de na cluichí sin, ní féidir rá go mbeidh céilithe comhraic níos láidre ar fáil ar an turas.

Caillfidh imreoirí an deis imirt i gcluiche idir-chúige, ceann de na cluichí is spleodracha agus is fisiciúla den séasúr. Caillfidh dhá fhoireann a shroich an babhta leathcheannais den URC anuraidh (Laighin agus Ulaidh) an choimhlint sin. Shroich na Stormers agus Bulls an cluiche ceannais anuraidh agus ní bheidh roinnt de na himreoirí is fearr atá ag Connachta ar fáil don dá chluiche sin; ní fheictear domsa go bhfuil mórán céille leis sin.

Teastaíonn ó Easterby doimhneacht a chruthú san fhoireann. Tá sé ag iarradh na himreoirí seo a chur faoi bhrú ionas go bhfeicfidh sé céard a dhéanfaidís agus iad ag imirt faoin mbrú sin. Ach tá an Afraic Theas, Fidsí, agus an Astráil ag teacht go hÉirinn i mí Samhna. Nach féidir deis imeartha a thabhairt dóibh i gceann de na cluichí sin, nó fiú dhá chluiche? Bheadh i bhfad níos mó brú orthu, bheadh siad fós ar fáil do na cúigí do na cluichí URC, agus bheadh lucht leanúna na hÉireann breá sásta na himreoirí seo a fheiceáil ag imirt i gcluichí móra.

Ní dóigh liom go raibh Wilkins, Rowntree, Cullen, nó McFarland ag pleanáil do na babhtaí seo gan na himreoirí seo. Smaoinigh faoi Ulaidh, mar shampla. Má tharlaíonn an turas, is dóigh go gcaillfidh McFarland leithéidí Doak, McCloskey, O’Toole, Treadwell, Timoney, agus roinnt imreoirí eile ar nós Baloucoune ar feadh trí bhabhta URC (ar a laghad). Imreoirí thar a bheith tábhachtach iad seo d’Ulaidh. Ach ag an am céanna, imreoirí atá maith go leor chun imirt in aghaidh Fhidsí nó na hAstrála i mí Samhna. 

Ní thuigim féin cén fáth nach dtabharfadh an deis sin dóibh.