Tá Arlene Ní Chonbhuí san Astráil agus í ag leanúint fhoireann sacair na hÉireann ag Corn Domhanda Shacar na mBan an mhí seo. Beidh tuairiscí rialta á scríobh aici do NÓS faoi eachtraí agus éachtaí mhná na hÉireann.
Thaisteal foireann na hÉireann go Perth Dé Domhnaigh seo caite don chluiche mór in aghaidh Cheanada an lá inné. Bhí an dóchas le mothú anseo sna laethanta roimh an gcoimhlint ach ní raibh an bua i ndán do na mná ar deireadh.
Bhí an t-atmaisféar dochreidte i Staid an Rectangular nuair a fuair Katie McCabe cúl draíochtúil tar éis ceithre nóiméad den chéad leath. Thug an cúl ardú meanman don fhoireann ar fad, agus dúinne mar lucht leanúna chomh maith.
Roimh dheireadh na chéad leithe, áfach, d’éirigh le Ceanada na foirne a chur ar comhscór, agus thiontaigh an aimsir lena chois. Bhí sé go hannis. Le linn an tsamhraidh in Perth is féidir leis an teocht ardú thar 40 céim ach 11 chéim a bhí ann aréir i Staid an Rectangular, agus muid go léir fliuch go craiceann.
Sa dara leath, tháinig cúl an bhua ó na Ceanadaigh ach níor éirigh cailíní na hÉireann as an iarracht. Bhí an-imirt acu in amanna mar aon le cúpla deis iontach ag McCabe – ní haon ionadh é gur bronnadh imreoir an chluiche uirthi ag deireadh na hoíche. “Dá mbeinn féin ag imirt ina héadan, bheadh eagla orm,” a dúirt láithreoir ó Optus Sport na hAstráile faoin laoch.
Tá an cluiche thart – agus tá deireadh anois le seansanna na tíre dul ar aghaidh chuig an gcéad bhabhta eile – ach tá neart Éireannach i bPerth i gcónaí. Braithimid ar fad sa bhaile anseo faoi láthair toisc go bhfuil aimsir na hÉireann ann – an ghrian ag taitneamh nóiméad amháin agus an bháisteach ina dhiaidh.
Tá go leor le déanamh ann in ainneoin na doininne. Is cathair iargúlta í atá suite ar chósta iarthar na hAstráile, agus tá an dúlra mórthimpeall air. I measc na mbuaiceanna áitiúla tá Oileán Rottnest – oileán álainn ar a bhfuil tránna lán le gaineamh bán agus é faoi chosaint mar gheall ar an bhflóra agus ar an bhfána a chónaíonn ann. Is é an t-oileán seo an t-aon áit ar domhan a chónaíonn an quokka – marsúipiach beag a thagann chugat de ruathar ar nós faoileáin na hÉireann má thosaíonn tú ag ithe bia gar dóibh!
Ach is ar Brisbane atá ár n-aghaidh anois don chluiche deireanach i gcoinne na Nigéire Dé Luain, áit a mbeimid faoin ngrian mhór arís.
Leanaigí ar aghaidh a chailíní, beimid libh an bealach ar fad!
