Rachaidh Éire agus Sasana chun páirce tráthnóna i Sraith UEFA na Náisiún ach is ar Íoslannach fir a bheidh cuid mhór den aird ag lucht tacaíochta na hÉireann.
Is é cluiche an lae inniu i Staid Aviva an chéad uair a bheidh Heimir Hallgrímsson i gceannas ar an fhoireann náisiúnta sacair ó tháinig sé i gcomharbacht ar John O’Shea le linn an tsamhraidh.
Ní beag an dúshlán atá roimh Hallgrímsson, a bhí ina bhainisteoir ar Iamáice agus ar an Íoslainn féin roimhe seo, ach i bhfianaise an mhéid a dúirt sé ag an phreasócáid réamhchluiche inné tá sé ag dúil go mór lena bhfuil i ndán dó.
Má tá sé anois i lár an aonaigh sa tír seo agus é i gceann de na poist is mó i saol spóirt na hÉireann, ní sin an t-aon nasc atá ag Hallgrímsson le hÉirinn.
‘Vestmannaeyjar’ an t-ainm atá ar an oileánra beag amach ó chósta theas na hÍoslainne ar rugadh agus ar tógadh ann é.
‘Oileáin Fhir an Iarthair’ is ciall don logainm agus is do Ghaeil na hÉireann agus na hAlban atá an mhír ‘Vestmann’ ag tagairt.
Is é sin an t-ainm a thug na Lochlannaigh ar na Gaeil ag an am mar gurbh as an Iarthar iad i gcomparáid le Críoch Lochlann féin.
Agus cén fáth ar baisteadh na hoileáin bheaga seo as na Gaeil?
Ar ndóigh, dar le lámhscríbhinní ársa na Lochlannach go raibh manaigh Éireannacha san Íoslainn sular bhain siad féin an t-oileán amach sa 9ú céad ach is cosúil gur le hÉireannaigh eile a bhaineann na Vestmannaeyjar, sclábhaithe Gaelacha le bheith beacht.
Ingólfur Arnarson ab ainm don chéad Lochlannach a lonnaigh san Íoslainn agus bhí bráthair gaoil aige darbh ainm Hjörleifur.
Mar ba dhual do na Lochlannaigh ag an am, bhí tráileanna, nó sclábhaithe, ag Hjörleifur – Gaeil a bhí iontu a fuadaíodh ar cheann de na ruathair a thug Hjörleifur ar Éirinn.
Tharla sé áfach gur mharaigh na sclábhaithe Gaelacha seo Hjörleifur i ndeisceart na hÍoslainne in 875 sular theith siad go dtí na hoileáin bheaga amach ón chósta, áit ar maraíodh a bhformhór tamall ina dhiaidh sin.
Scéal tragóideach gan aon agó ach léiríonn sé an dlúthnasc idir na Gaeil agus muintir na hÍoslainne, agus tá an tionchar sin go fóill le brath in ainm an oileanrá agus i stair an cheantair.
Ní fios cé acu an raibh nó nach raibh an seancheangal sin le hÉirinn i gcúl a chinn ag Hallgrímsson nuair a ghlac sé le post an bhainisteora ach beidh muid uilig ag súil gur comhoibriú fóinteach seachas slad fuilteach a bheidh roimhe féin agus a chuid imreoirí Éireannacha i mBaile Átha Cliath anocht.
Éire abú!
