Tá sé éasca go maith tús a chur le nós nua, nach bhfuil? Níl aon stró orainn nuair a shocraíonn muid rud éicint nua a dhéanamh, nó scil nua a fhoghlaim. Is é an fhadhb, áfach, ná go bhfuil sé éasca go maith tús a chur le rudaí, ach níl sé leath chomh simplí coinneáil leis. Agus de réir mar a théann muid in aois, éiríonn sé níos deacra fós tús a chur le rudaí nua.
Sin é an fáth go bhfuil an-mheas agam ar mo chomhghleacaí ó Off The Ball, Kevin Kilbane. Chaith sé na blianta sna buataisí sacair, agus anois beidh sé ag caitheamh seala agus buataisí galánta scátála air agus é san iomaíocht in Dancing On Ice ar ITV.
Bhí sé ag insint dom faoi coicís ó shin, agus ar ndóigh, an chéad cheist a chuir mé air ná an raibh taithí ar bith aige ar an leac oighir, agus is cosúil, ach an oiread leis an gcuid eile againn, nach bhfuil, seachas sleamhnú ar phaiste sciorrach sa ngeimhreadh. Cinnte, bhí seal den saol nuair a bhí sé an-aclaí go deo, agus beidh air a chuid scamhóg agus matán a thabhairt ar ais chun dáta arís chomh maith.
Beidh sé ag foghlaim scil iomlán nua, os comhair an phobail. D’imir sé d’fhoireann Phoblacht na hÉireann os cionn céad uair, ach tá sé seo ag cur níos mó scéine ar an bhfear ná mar a chuir an sacar riamh air.
Tá údar ann nach dtéann muid ag foghlaim scileanna nua agus muid níos sine. Níl sé éasca. Ach ba cheart dúinn ar fad é a dhéanamh. Tá sé go maith don inchinn, agus don chorp. Tá sé de nós againn breathnú ar an am a thógfadh sé, agus ar an achar a bheadh muid go dona aige, in áit a thuiscint nach bhfuil ann ach cleachtadh de bheagán a dhéanamh chuile lá.
Le blianta, creideadh nach bhféadfaí an intinn a athrú, agus go raibh an duine sáinnithe le cibé cineál éirimiúlachta a bhí acu ón lá a rugadh iad. Tá a fhios againn anois nach bhfuil sé sin fíor. Is féidir muid a mhúnlú. Gach uair a chuireann muid corr nua ar an inchinn táimid dár n-insliú féin ó ghalair inchinne agus ag cothú dearcadh níos dearfaí ar an saol, rud a thugann insliú dúinn ón dúlagar. Tugann sé níos mó muiníne dúinn.
Ciallaíonn sé freisin go bhfuil go leor den chlúmhach a fheiceann muid ar Instagram fíor faoin meon dearfach, agus gur féidir leis an dearcadh atá agat ort féin agus ar an saol a athrú. Agus cuireann foghlaim leis an mborradh inchinne sin. Ach caithfidh tú an cloigeann a chur faoi bhrú má tá tú le maitheas a bhaint as. Leis an traenáil atá os comhair Kevin Kilbane bhoicht, seans maith nach gcuirfidh galar inchinne as dó agus é ag dul amach san aois. Tá súil agam go mbeidh sé in ann an rud céanna a rá faoina chorp tar éis cúpla mí a chaitheamh ar an leac oighear.
