‘Tá an Superbowl níos fearr ná Cluiche Ceannais na hÉireann’

Tá sé deacair é seo a admháil… ach taitníonn an pheil Mheiriceánach liom. Tá a fhios agam, dúirt mé é sin ós ard. Cloisim mo mhuintir uilig ar ais in Éirinn ag ligint cnead astu, Muireann s’againne atá gafa leis an bpeil Ghaelach agus an chamógaíocht ag dul i dtaithí ar spórt eile? Ach tá sé deacair éalú as an mealladh atá ag an spórt seo. 

Cinnte, thóg sé beagán ama orm dul i dtaithí air agus na rialacha is tábhachtaí a thuiscint, bhínn ag titim i mo chodladh don chéad chúpla cluiche! Ach nuair a bhíonn tú ag crochadh timpeall leo siúd atá chomh gafa sin leis, mar atáimse gafa le spóirt Ghaelacha, ní fhéadfá éalú as!

I mbliana, is iad na Los Angeles Rams agus na Cincinnati Bengals a bhí ag imirt sa Super Bowl, agus bhí chuile dhuine ag caint faoi. Ar an teilifís, ar an raidió, ar na meáin, bhí tuairim ag gach duine ar an gcluiche. Tá sé suimiúil breathnú ar na staitisticí atá ag an dá fhoireann maidir leis an rath atá acu sa Super Bowl. 

Tá na Bengals théis áit a bhaint amach in dá Super Bowls, ach chaill siad an dá cheann, agus ní raibh cluiche iarshéasúir buaite acu ó na 1980dí. Shroich na Rams an Super Bowl faoi dhó idir 1999 agus 2001, agus bhuaigh siad in aghaidh na Tennessee Titans ach chaill siad an dara cheann in aghaidh na New England Patriots. Mar sin, bhí chuile duine ag súil le coimhlint mhaith idir an dá fhoireann.

Bhí mé iontach sceitimíneach don chéad eispéireas a bheadh agam den Super Bowl, go háirithe toisc go raibh mé ag caitheamh an deireadh seachtaine le mo mham in Chicago. Bhí sí ansin agus í ag déanamh cur i láthair ag comhdháil mhór agus thug mé rabhadh di roimh ré go mbeinn ag iarraidh am a chaitheamh ag féachaint ar an gcluiche. Théis lá fada ag siúl timpeall na háite agus í ag obair, d’aontaigh sí teacht liom chuig an teach tábhairne Kitty O’ Shea’s ar Michigan Avenue chun féachaint air.

Ní raibh mé ar thaobh foireann amháin ná foireann eile. Bhí mé ag súil go mbeidh an mbua ag na Bengals mar ba iadsan na ‘Underdogs’. Ach, thaitin Matt Stafford agus Cooper Kupp liom théis bheith ag breathnú ar chluichí na Rams i rith an tséasúir. Caithfidh mé a admháil, d’athraigh mé m’intinn i rith an chluiche, ach d’fhan mo mham leis na Rams don chluiche uilig, agus bhí sí iontach sásta faoi dheireadh an chluiche. 

Bhí iontas orainn ag an ‘Half-Time Show’ daoine cosúil le Snoop Dogg, 50 Cent agus fiú Eminem a fheiceáil ag canadh agus ag rapáil, bhíos in ann na liricí a rá os ard agus bhí an garda slándála san áit ag gáire orm agus mé ag baint sult as. Cheap mé go mairfeadh sé beagán níos faide, ní cúig nóiméad déag amháin, ach arís bhí ba chuid de thraidisiún an Super Bowl a bhí i gceist agus lean mé orm ag baint sult as gach rud.

Cluiche lán le dráma a bhí i gceist, agus thaitin sé go mór liom bheith in ann na rialacha a mhíniú do mo mham théis iad a phiocadh suas le cúpla mí anuas. Cuma orm go raibh mé i m’fhíor ‘fan’, cé gurbh iad na Patriots an fhoireann ab fearr liom! Le cúnamh Dé beidh mé ag féachaint ar na Patriots sa Super Bowl an bhliain seo chugainn!