Beidh an Corn Domhanda ag tosú go luath agus níl ach ceist amháin is féidir a chur faoin gcomórtas i mbliana – an mbeidh foireann ar bith in ann Sasana a stopadh?
Tá Sasana ag teacht isteach sa chomórtas seo i mbarr a réime. Tá níos mó cluichí buaite acu i ndiaidh a chéile ná aon fhoireann (fear nó ban) riamh sa spórt. Bhuaigh siad an comórtas in 2014 (an t-aon chomórtas nár bhuaigh an Nua-Shéalainn) agus tháinig siad sa dara háit in 2017. Ach i mbliana beidh siad ag iarraidh Corn Domhanda 2021 (cuireadh siar an comórtas go dtí 2022 mar gheall ar COVID-19 ach choinnigh siad an t-ainm) a bhuachan. Agus cén fáth nach mbeadh?
Tar éis an chomórtais sin in 2017, athraíodh rugbaí na mban. Tugadh conarthaí d’imreoirí (an chéad fhoireann ban a rinne a leithéid). Tugadh deis dóibh a bheith ina n-imreoirí gairmiúla. Bhí siad in ann rugbaí a imirt lánaimseartha. Agus is í an fhoireann seo an toradh ar na cinntí sin.
Níor chaill an fhoireann seo cluiche ó mhí Iúil 2019, nuair a chaill siad in aghaidh na Nua-Shéalainne. Ó shin, bhuaigh siad in aghaidh na Nua-Shéalainne faoi dhó, agus ba iad sin an dhá chailliúint ba mheasa a bhí acu riamh. Tá imreoirí dochreidte acu ar nós Emily Scarratt, Zoe Harrison, agus Sarah Hunter. Ach an rud is fearr fúthu ná an stíl rugbaí a imríonn siad; tá siad in ann rith tharat nó timpeall ort má bhíonn fonn orthu.
Tá Sasana sa ghrúpa céanna leis an bhFrainc agus tá an t-ádh orainn mar lucht féachana go mbeidh deis againn an dhá fhoireann seo a fheiceáil in adharca a chéile ar an 15 Deireadh Fómhair.
Go dtí seo, chríochnaigh an Fhrainc sa tríú háit sé huaire sa chomórtas seo agus is léir go mbeidh orthu an lámh in uachtar a fháil in aghaidh Shasana chun an cluiche ceannais a shroicheadh nó an comórtas seo a bhuachan i mbliana. Foireann thar a bheith fisiciúil atá iontu ach an mbeidh an struchtúr riachtanach chun an bua a fháil?
Ach an fhoireann is dainséaraí do Shasana ná an Nua-Shéalainn. Ón am a chaill siad na cluichíthuasluaite in aghaidh Shasana, tá Wayne Smith tar éis teacht isteach mar bhainisteoir na foirne. Mura bhfuil fios agat cé hé féin is dóigh gurb é an bainisteoir is fearr ar domhan. Bhíodh sé ag obair le foireann na bhfear agus thóg sé isteach stíl cosanta chomh rathúil sin nach raibh aon fhoireann in ann an lámh in uachtar a fháil air. Ní hamháin sin, ach rinne sé an rud céanna leis an struchtúr ionsaithe a bhí acu nuair a bhí sé i gceannas ar sin freisin.
Bhí fadhbanna ag Nua-Shéalainn leis an seanbhainisteoir, Glenn Moore. D’éirigh sé as a phost i míAibreáin tar éis líomhaintí tromchúiseacha de náiriú colainne agus ráitis dhúra chultúrtha i measc líomhaintí eile. Chaill an fhoireann ceithre chluiche in aghaidh a chéile in aghaidh Sasana agus an Fhrainc. B’fhéidir nach bhfuil cuma ródhona ar na cailliúintí sin, ach níor chaill siad ach dhá chluiche dhéag riamh roimhe sin. Is léir go raibh fadhbanna ann.
Ciallaíonn sé sin nach raibh ach sé mhí ag Smith leis an bhfoireann agus bhí air go leor rudaí a cheartúsan am sin, ní hamháin ar an bpáirc ach sa seomra feistis freisin. Ach tá siad ar an mbealach ceart arís: ótháinig Smith isteach, bhuaigh siad gach cluiche a d’imir siad go dtí seo, chomh maith le bua ollmhór in aghaidh na Seapáine le déanaí. Tá an comórtas seo buaite acu cúig huaire; beidh siad ag iarradh an séúceann a fháil ach seasann Sasana sa bhealach.
Má éiríonn le Sasana an comórtas a bhuachan agus má bhuann siad gach cluiche ar an mbealach chuig an gcuriarracht sin, is léir go mbeidh muid ag féachaint ar an bhfoireann is rathúla i stair an chluiche.
