‘Táim in ann labhairt as Gaeilge’ – McGregor

Tá an trodaí Éireannach, Conor McGregor, le feiceáil i bhfíseán atá á scaipeadh ar na meáin shóisialta agus é ag maíomh as a chumas labhartha sa nGaeilge. Tá an físeán le feiceáil ar an suíomh Streamable, agus ní léir faoi láthair cé a ghlac, ach tá an chosúlacht ar an scéal gur i gcathair Chicago atá sé ag labhairt.

Bhí McGregor i Meiriceá do Lá Fhéile Pádraig agus d’fhreastail sé ar imeachtaí in Boston agus in Chicago.

“Tá mé in ann labhairt as Gaeilge,” a fhreagraíonn sé do cheist nach gcloistear sa bhfíseán féin, sula bhfreagraíonn sé an cheist “cad is ainm duit?”.

“Conchúr Mac Griogair, that’s how you say ‘Conor’ in Irish, ‘Conchúr,” a dúirt sé.

Cloistear bean sa slua ag béiceach “buíochas le Dia” nuair a fhreagraíonn an trodaí an cheist.

Thug sé le fios freisin gurbh é an focal Gaeilge ‘croí’ a spreag an t-ainm a thug sé ar a iníon a rugadh níos túisce i mbliana – Croia.

“Croia means from the heart or of the heart. Croí as Gaeilge means heart. That is my heart, my little baby girl,” a dúirt sé.

An bhliain seo caite, chuir trodaí eile UFC olc ar McGregor nuair a dúirt sé gur aisteach leis go mbíonn an trodaí as Baile Átha Cliath ag déanamh gaisce as a chuid Éireannachais agus ‘gan an Ghaeilge ar a thoil aige’.

Mar a tuairiscíodh ar Tuairisc.ie mí Dheireadh Fómhair, dúirt Khabib Nurmagomedov:

“Ní labhraíonn sé siúd ach an t-aon teanga amháin agus bíonn sé ag rá ‘Ó, bíonn muide ag troid le hImpireacht Shasana’, ach cad a tharla do do theanga féin?

“Má tá grá agat do do thír, ní mór duit do theanga a labhairt. An amhlaidh nach bhfuil uait ach teacht i láthair agus a rá gur Éireannach tú agus an brat a thabhairt leat ach gan labhairt do theanga féin a bheith agat. Béarla a labhraíonn tú.”

In agallamh a thug an trodaí eile Éireannach, Tom Egan, do Tuairisc.ie i ndiaidh na heachtra, dúirt sé gur chóir do McGregor an deis a thapú an Ghaeilge a labhairt níos minice agus an teanga a chur i lár an aonaigh.

“Ní cheapaim nach mbeidh tacaíocht ag McGregor ó phobal na Gaeilge, faoi mar a dúirt Khabib. Tá mé cinnte, áfach, go bhfuil pobal na Gaeilge curtha ag smaoineamh aige. Cén fáth nach bhfuil níos mó Gaeilge á labhairt ag McGregor agus neart Gaeilge aige ó bhí sé i scoil lán-Ghaeilge? Nach bhfuil sé bródúil as a theanga féin? B’fhéidir gur cuma leis agus tá sé sin togha freisin. Ach cinnte chuirfeadh sé pobal Gaeilge ag smaoineamh,” a dúirt Egan le Tuairisc.ie.